耶穌由個處起行、經過約但河外、到猶太嘅境地、眾人再聚埋嚟佢處、耶穌照常、再教佢哋○
法利賽人想試耶穌、嚟問佢話、人出妻著唔著呢。
耶穌答佢哋話、摩西點樣吩咐你呢。
個的人話、摩西准我哋寫分書、嚟出佢呀。
耶穌答佢哋話、因你哋心硬、故此為你哋寫落呢的誡命。
但起首創造個時、上帝造出有男有女。
故此人將離開父母、共妻膠合、
兩人成為一體、噉就唔重算係兩個、算係一體呀。
所以上帝所配合嘅、人唔好分開。
耶穌喺屋裏、門生再𢬿呢件事嚟問佢、
耶穌對佢哋話、但凡出佢妻、娶過別個嘅、就係辜負個妻、嚟犯姦淫嚹。
倘若妻丟棄丈夫、嫁過別人、佢亦係犯姦淫嚹。○
有人帶住的嫩仔嚟、想耶穌摩吓、門生責罰佢哋。
但耶穌一見、就唔歡喜、對門生話、由得個的嫩仔嚟我處、唔好禁止佢、因為得上帝國嘅、正係噉樣嘅人呀。
我實在話你哋知、但凡承受上帝國嘅、唔似嫩仔噉樣、必唔入得個國。
噉就抱起個的嫩仔、俾手按吓佢、祝福佢。○
耶穌出去路上、有一人走到面前、跪倒處問佢話、良善嘅老師呀、我要做乜野、致得永生呢。
耶穌對佢話、你為乜稱我良善呢、除嘵上帝之外、冇一個係良善(口駕)。
各條誡命、你識哩、即係唔好殺人、唔好行淫、唔好偷野、唔好妄證、唔好呃騙人、又要孝敬你嘅父母。
佢對耶穌話、老師、呢各條誡、我自少時都守住咯。
耶穌睇住佢、愛痛佢、就對佢話、你重少一件呀、去賣嘥你所有嘅、嚟周濟窮人、就是必有財帛喺天上、而且嚟跟從我。
佢聽聞呢的說話、就變嘵面色、閉翳而去、因為佢有好多產業呀。
耶穌周圍望吓、對佢門生話、有錢財嘅人、入上帝國、係好難嘅。
門生驚奇佢嘅說話、耶穌再答佢哋話、小子呀、恃錢財嘅人、入上帝國、係好難咯。
駱駝穿過針眼、比較財主人、入上帝國、更容易呀。
門生了不得咁驚奇、就對佢話、噉就乜誰可以得救呢、
耶穌望住佢哋話、在人實係不能、在上帝就唔係、因為上帝係無所不能呀。○
彼得就對耶穌話、我哋已經捨嘵所有嘅、嚟跟從你咯。
耶穌答話、我實在話你哋知、為我及福音、離開屋宇、兄弟、姊妹、父母、仔女、田地嘅、
未有唔喺今世得番百倍(口駕)。即係屋宇、兄弟、姊妹、母親、兒女、田地、亦有迫害、惟係來世得永生。
但好多先頭嘅人、將做尾後、尾後嘅人、將做先頭呀。○
佢哋上耶路撒冷個時、喺路上、耶穌先行、門生見好出奇、跟從嘅又見驚慌。耶穌再帶住十二門生、𢬿自己將遇嘅事、對佢哋講話、
我哋上耶路撒冷、人子必被人交過眾祭司長、及讀書人、佢哋將定佢死罪、解過異邦人。
又必凌辱佢、俾口水唾佢、鞭打佢、又殺佢、到第三日、佢就復生咯。○
西比太嘅仔雅各約翰、嚟到耶穌處話、老師、我哋所有求你嘅、想你共我做呀。
耶穌對佢哋話、你想我共你做乜野呢。
佢哋答話、你乗榮個時、求賜我哋一個坐你右便、一個坐你左便。呀。
耶穌對佢哋話、你唔知到你所求嘅咯、我所飲嘅杯、你飲得唔呢、我所受嘅洗禮、你受得唔呢。
佢哋話、做得。耶穌對佢話、我所飲嘅杯、你哋是必飲、我所受嘅洗禮、你哋是必受。
但坐我左便右便唔係我賜得、獨係預備賜過乜誰、就賜過佢呮。
十個門生聽聞、就好唔歡喜雅各約翰
耶穌叫佢哋嚟話、異邦人嘅君王、做佢哋嘅主、大臣用權柄嚟管理佢哋、呢的你知到哩。
惟係你哋唔好噉樣、你哋之中、乜誰想做大嘅、必做你哋嘅使喚人、
乜誰想做頭目嘅、必做眾人嘅奴僕。
因為人子嚟、唔係要人服事佢、乃係佢服事人、而且捨自己生命、替眾人贖罪呀。○
到嘵耶利哥耶穌共門生、及大眾出耶利哥時、有個盲眼乞兒、即係底買嘅仔、巴底買、坐倒路邊。
聞得係拿撒勒耶穌、就大聲叫話、大闢嘅子孫耶穌、可憐我呀。
眾人責成佢、叫佢咪出聲、佢越發大聲叫話、大闢嘅子孫、可憐我呀。
耶穌歇住腳、話、叫佢嚟、個的人就叫個盲眼嘅話、你安心、起身喇、耶穌叫你呀。
佢就丟棄衣服急的起身、嚟到耶穌處。
耶穌對佢話、你想我共你做乜野呢、盲眼嘅答話、主呀、我想睇得見呀。
耶穌對佢話、你去喇、你嘅信德醫好你咯、佢即時睇得見、就喺路上跟從耶穌而去。