過嘵兩日、有個逾越節、即係除酵節、眾祭司長及讀書人、商量用乜野詭計、捉耶穌嚟殺。
但佢哋話、唔好喺節期個時、怕百姓生亂。○
耶穌喺伯大尼痲瘋西門嘅家、坐在席上、有個女人、𢬿玉盒裝住至正至貴嘅香油嚟、揭開玉盒、斟落耶穌頭上。
有的人、心唔歡喜話、使乜咁花費個的香油呢、
呢的香油、可以賣得三十多兩銀、𢬿嚟施舍窮人吖、佢哋就執責個女人。
耶穌話、由得佢喇、做乜攪擾佢呢、佢向我做一件好事呀。
因為個的窮人、常時同你哋喺處、你想好看待佢、隨時都做得、但我唔係常時同你哋喺處。
呢個女人、盡佢嘅力嚟做、先𢬿香油搽我身、係預備我埋塟嘅呀。
我實在話你哋知、通天下、唔論喺邊處、傳福音、都要講起呢個女人所做嘅、嚟記念佢。
十二門生之中有一個加略人猶大、去見眾祭司長、想賣耶穌過佢哋。
佢哋聽聞好歡喜、應承俾銀過佢、猶大就搵機會嚟賣耶穌。○
除酵節第一日、劏逾越節羊仔個時、門生問耶穌話、你想我哋去邊處預備、等你食逾越節、嘅筵席呢。
耶穌就打發兩個門生對佢話、你去入城、必有一個人擰水埕嘅、遇著你哋、你跟住佢。
佢入去嘅屋、你對家主話、老師有話、我客房喺邊處、等我共門生喺處食逾越節嘅筵席呢。
佢必俾一間擺設齊整嘅大樓過你睇、你就喺個處、為我哋預備喇。
門生就去入城、果然遇著照依耶穌對佢哋所講嘅、就預備逾越節嘅筵席。○
到挨晚時、耶穌同十二門生嚟。
佢哋坐在席上、食開個時、耶穌話、我實在話你知、你哋之中、有一個共我同食嘅、是必賣我呀。
門生就閉翳起嚟、逐一逐一問佢話、係我咩。
耶穌對佢哋話、十二門生之中、有一個同我擠手落碟嘅、就係咯。
人子將過世、係照聖經所指著佢嘅、但係賣人子個人有禍咯、個個人唔生出嚟重好。○
食緊個時、耶穌擰餅祝謝、就擘開俾過門生話、你擰喇、呢的係我嘅身呀。
又擰隻杯感謝、𢬿嚟俾過門生、大眾就飲嘵。
耶穌對佢哋話呢的係我嘅血、即係新約嘅血、為眾人流嘅。
我實在話你哋知、我唔再飲菩提樹所生嘅、等到個日、我喺上帝國、致飲新嘅咯、
佢哋唱嘵一首詩、就去到橄欖山。
耶穌對佢哋話、你哋眾人必厭棄我、因為聖經有話、我將打個牧人、噉就群羊散嘥咯。
但我復生之後、必先過你哋去到加利利。
彼得就對佢話、眾人雖然厭棄你、我必唔係。
耶穌答佢話、我實在話你知、今晚第二次雞啼之先、你是必三次唔認我。
但彼得又極力話、即使共你同死、我斷冇話唔認你、眾人亦你噉樣講。
去到一笪地方、叫做客西馬尼、耶穌對門生話、你哋坐倒呢處、等我祈禱。
於是帶住彼得雅各約翰同埋自己行、就好驚慌、好悲切、
對佢哋話、我心閉翳到死咯、你哋喺呢處等候、又要儆醒呀。
佢就行前幾步、𡂈倒地處祈禱話、呢個時候、可以免得、就求免喇。
又話、亞爸父呀、你係無所不能、求你𢬿呢隻杯離開我、但唔係要從我所想、惟係從你所想呮。
番嚟、見門生瞓著、就對彼得話、西門、你瞓覺咩、你不能儆醒半個時辰咩。
儆醒呀、祈禱呀、免致人迷惑呀、你心係情願、但身體軟弱咯。
又再去祈禱、說話同一樣。
又番嚟佢見門生瞓著、因係眼倦呀、佢哋都唔知點樣回答耶穌。
又第三次番嚟、對佢哋話、你哋可以瞓覺安息咯、罷咯、時候到嚹、人子係賣過罪人嘅手嚹。
起身喇、我要去咯、賣我個個人嚟近咯。○
講緊個時、十二門生之中、有個猶大、同埋好多人嚟、揸刀揸棍、喺眾祭司長讀害人長老個處嚟。
賣耶穌個人、先俾個暗號過佢哋話、我所親嘴嘅、就係佢咯、捉倒要子細拉佢去呀。
已經嚟到、即刻行埋耶穌處話、夫子、就同佢親嘴。
個的人就落手捉耶穌。○
喺側邊企處嘅、有一個人、拔出把劍、斬大祭司長嘅僕、削用佢雙耳。
耶穌對眾人話、你哋揸刀揸棍嚟捉我、好似捉賊噉咩。
我日日共你喺殿裏教人、你哋唔捉我、但噉係令聖經所載嘅得應驗咯。
門生個個離開耶穌走去。
有一個少年嘅人、佢身獨係摟住一塊蔴布、嚟跟耶穌、個的人捉住佢。
佢就褪用個塊蔴布、赤身走去。○
眾人拉耶穌去個大祭司長面前、眾祭司長及長老讀書人都齊集。
彼得遠遠跟住耶穌、入到大祭司長嘅院、共個的差役坐處焙火。
眾祭司長、及全公會嘅人、搵見證嚟告耶穌想害死佢、但唔搵得倒。
因為好多人做假證告佢、但係所證嘅唔相合。
又有幾個人、起身𢬿假證嚟告佢話。
我哋聽過佢講話、呢間殿、係人手所做嘅、我將拆嘵佢、三日內、起過一間、唔係人手所做嘅。
但佢地所證亦唔相合。
大祭司長喺眾人之中、起身問耶穌話、你冇說話回答咩、呢的人做證告你乜野呢。
耶穌總唔出聲答佢、大祭司長再問佢話、你係可讚頌者之子基督唔係呢。
耶穌話、我係咯、你哋將來見人子、坐在全能者嘅右便、駕住天雲落嚟呀。
大祭司長就擘爛自己衣服、話我哋重要搵乜野見證呢。
你哋已經聽聞佢褻凟嘅話哩、你哋意思點呢、眾人擬佢應得死罪。
就有的俾口水唾佢、有的遮住佢面、𢬿拳頭打佢話、你係先知、試話出乜誰吖、個的差役又𢬿手掌摑佢
彼得喺下院處、大祭司長有一個妹仔嚟、
見彼得焙火、就睇住佢話、你平素都係同埋拿撒勒耶穌嘅。
彼得唔認就話、我唔知、亦唔曉你講乜野、噉就出去、行到大門口嘅簷邊、雞就啼。
個個妹仔見佢、再對企倒側邊嘅人話、呢個人係同佢哋一黨𡃉、但彼得又唔認。
歇冇耐、企倒側邊嘅人、再對彼得話、你真係同佢哋一黨嘅咯、因為你係加利利人呀。
彼得就咒詛、而且誓願話、你哋所講個個人、我唔識佢呀。
雞即時第二次啼、彼得記起耶穌所講、話第二次雞啼之先、你必三回唔認我、想著呢句說話、就喊起嚟。