耶穌再喺海邊教人、有群眾嚟親就佢、噉佢就落船坐處、浮在海面、眾人喺海邊、企在岸上。
耶穌設譬喻、𢬿多端教佢哋、教訓之時、對眾人話、
你哋聽呀、有一個撒種嘅人出去撒種。
撒個時、有的跌落路邊、雀鳥嚟到食嘥、
有的跌落石地泥薄個處、因為泥土唔深、發芽好快、
但係冇根、熱頭出嚟晒佢、就枯槁咯。
有的跌落荊棘裏頭、荊棘發生起嚟、就逼死佢唔結得實。
有的跌落肥地、發生長大起嚟、結實有三十倍、有六十倍、有一百倍、
又話有耳可聽嘅、就要聽嚹。○
耶穌靜坐個時、圍住佢嘅人、共十二門生、𢬿呢的譬喻問佢、耶穌對佢哋話、
上帝國嘅奧妙、係俾過你哋、若係外人、就要用譬喻教佢、
等佢哋雖然睇、都唔明白、雖然聽、都唔曉得、免至佢改變而得罪赦、
又對佢哋話、呢的譬喻、你都唔曉、點曉得各樣譬喻呢。
撒種嘅、即係傳道理。
撒落路邊嘅、即係人嘅聽道理、撒但就嚟、將撒在佢心嘅道搶嘵。
撒落石地嘅、即係人聽道理、就歡喜接受、
但係心內冇根蔃、不過暫時呮、及至為道有艱難陷害、佢就即時厭棄、
撒在荆棘裏頭既、即係人聽道理、
有今世嘅掛慮、共錢財嘅迷惑、與及各樣嘅私慾、都嚟逼死道理、唔結得實。
撒落肥地嘅、即係人聽道理、就接納嘵、而且結實起嚟、有三十倍、有六十倍、有一百倍嘅。
耶穌又對佢哋話、人擰燈嚟、豈係擠落斗下、或床下嘅、唔係擠在燈臺上嘅咩、
因為總冇隱密嘅事、將來唔顯現、藏埋嘅事、將來唔露出嚟。
但凡有耳可聽嘅、就要聽呀。
又對佢哋話、你哋要謹愼所聽呀、你點樣量度人、人亦必噉樣量度你、而且是必加多賜過你。
因為有嘅、重要加添過佢、冇嘅、就連佢所有都要奪番。○
又話、上帝嘅國、好比人撒種落地、
佢日間起、夜間瞓、個的種發芽長大、個人都唔知佢點得噉樣。
地土自然能結實嘅、始初係秧、漸漸成穗、及後穗上結滿穀。
已經長熟、就用鐮刀、因為收割嘅時候到咯。○
又話、上帝嘅國、好比乜野呢、我地設乜野譬喻嚟解明佢呢、
好似一粒芥菜仁、撒落地個時、係世上百樣仁之中至細嘅。
撒落之後、就發起嚟、大過各樣嘅菜、而且生出的枝好大、至到空中雀鳥可以住在佢陰處。
耶穌又用好多噉嘅譬喻、對眾人傳道、係照依佢哋所能聽嘅。
唔係譬喻、就唔對眾人講、到淨係佢哋喺處個時、佢解明嘥過門生聽。○
個日挨晚時、耶穌對門生話、我哋要過個便岸。
噉就門生散嘵眾人、耶穌仍然喺船上、佢哋就共佢過海、另外有別隻船同行。
即有狂風大起、浪打入船、將近滿咯。
耶穌喺船尾、枕住枕頭瞓、門生叫醒佢、就對佢話、老師、我哋死咯、你都唔顧咩。
耶穌起身、喝個的風、對住海話、平靜喇、咪搖動咯、個的風就止息、海極平靜。
耶穌就對門生話、你哋使乜慌呢、未曾有信德咩、佢哋好驚慌。
大家相講話、呢個、係乜野人呢、風共海、亦順從佢呀。