哥林多前書 13 · 粵讀聖經

管理員上載／人工修訂；未另行獨立校對。

1 就算我講得出人嘅語言，甚至天使嘅語言，但如果我冇愛，我就變成咗響緊嘅銅鑼，或者鏗鏗響嘅鈸。

2 就算我有傳講預言嘅恩賜，明白晒一切奧祕同一切知識，又有十足嘅信心，連啲山都移得走，但如果我冇愛，我就乜都唔係。

3 就算我將自己全部財物都分出去，畀人有嘢食，甚至交出自己嘅身體畀火燒，但如果我冇愛，我一啲益處都得唔到。

4 愛有耐性，會善待人；愛唔會妒忌；愛唔會自吹自擂，唔會自高自大。

5 唔會做失禮嘅事，唔會追求自己嘅益處，唔會畀人激嬲，唔會將過錯記喺帳上。

6 唔會為不義嘅事開心，但係會同真理一齊歡喜。

7 愛無論遇到乜嘢都承受，無論遇到乜嘢都保持信心，無論遇到乜嘢都盼望，無論遇到乜嘢都忍耐落去。

8 愛永遠都唔會倒低。至於預言，會失去作用；講各種語言，會停落嚟；知識，亦都會失去作用。

9 因為，我哋所知道嘅，只係一部分；我哋傳講嘅預言，亦都只係一部分。

10 但係，完整嘅事物嚟到嗰陣，局部嘅事物就會失去作用。

11 我係細路仔嗰陣，講嘢好似細路仔，諗嘢好似細路仔，判斷事情亦都好似細路仔。我長大成人之後，就放低咗細路仔嗰套。

12 因為，我哋而家係透過塊鏡去睇，睇到嘅好似謎噉難明；到嗰陣，就會面對面。而家我知道嘅只係一部分；到嗰陣，我就會認識得清楚，就好似上帝已經認識我噉。

13 信心、盼望同愛，呢三樣而家都仲喺度；當中最大嘅就係愛。

授權：CC-BY-NC-SA-4.0