哥林多後書 13 · 粵讀聖經

管理員上載／人工修訂；未另行獨立校對。

1 今次我會第三次嚟你哋嗰度。「每一件事，都要憑兩個或者三個證人嘅證供嚟確定。」

2 我第二次喺你哋嗰度嗰陣，已經警告過嗰啲以前犯咗罪嘅人，同其他所有人；而家雖然唔喺你哋嗰度，我都再預先講明：如果我再嚟，我就唔會再留情。

3 因為你哋要求證據，證明基督係藉住我講嘢。佢對住你哋唔係軟弱嘅，反而喺你哋當中顯出能力。

4 因為佢係喺軟弱中畀人釘上十字架，卻靠住上帝嘅能力活住。我哋同佢相連，亦都係軟弱嘅；但喺對待你哋嘅事上，我哋會靠住上帝嘅能力，同佢一齊活住。

5 你哋要省察自己，睇吓係咪信主嘅；要考驗你哋自己。你哋唔係都認識自己，知道基督耶穌就喺你哋裏面咩？除非你哋經唔起考驗啦。

6 不過，我希望你哋會知道，我哋並唔係經唔起考驗嘅人。

7 我哋向上帝祈求，願你哋一件惡事都唔做。唔係為咗顯出我哋經得起考驗，而係為咗你哋去做善事，就算我哋睇落好似經唔起考驗都好。

8 因為我哋唔能夠做任何反對真理嘅事，只能夠為真理做事。

9 因為每逢我哋軟弱、你哋剛強，我哋就喜樂。我哋亦都為呢件事祈求，就係你哋得到修復，變得健全。

10 所以，我趁住而家唔喺你哋嗰度，寫低呢啲話，免得我到咗嗰陣，要按主畀我嘅權柄，嚴厲噉處理你哋。主畀我呢份權柄，係為咗建立你哋，唔係拆毀你哋。

11 最後，弟兄姊妹，要喜樂；要恢復健全；要接受勸勉；要同心；要和睦相處。賜愛同平安嘅上帝，就會同你哋一齊。

12 你哋要用聖潔嘅親吻互相問好。所有屬上帝嘅聖徒都向你哋問好。

13 願主耶穌基督嘅恩惠、上帝嘅愛，同埋同聖靈相通嘅福分，都同你哋所有人同在。

授權：CC-BY-NC-SA-4.0