使徒行傳 25章 — 粵讀聖經
更新：2026-10-08

1 非斯都到咗行省，三日後就從凱撒利亞上耶路撒冷。

2 祭司長同猶太人嘅首領向佢控告保羅，懇求佢

3 賣個人情畀佢哋，叫人將保羅押到耶路撒冷。佢哋想藉住呢個人情對付保羅，正策劃設埋伏，喺途中殺咗佢。

4 非斯都回答，保羅而家扣留喺凱撒利亞；佢又話，自己亦都好快會返去。

5 佢話：「噉就叫你哋當中有地位嘅人，同我一齊落去。如果呢個人做過乜唔啱嘅事，就由佢哋控告佢。」

6 非斯都喺佢哋嗰度最多留咗八日或者十日，就落咗凱撒利亞。第二日，佢坐上審判台，吩咐人帶保羅嚟。

7 保羅嚟到，嗰啲從耶路撒冷落嚟嘅猶太人就圍住佢，提出好多嚴重嘅指控，但係冇辦法證實。

8 保羅為自己申辯，話：「我冇違犯過猶太人嘅律法，冇冒犯過聖殿，亦都冇得罪過凱撒。」

9 非斯都想討好猶太人，就問保羅：「你願唔願意上耶路撒冷，喺嗰度由我審理對你嘅呢啲指控？」

10 保羅話：「我而家就企喺凱撒嘅審判台前，我應該喺呢度受審。我對猶太人冇做過任何唔啱嘅事，你自己都知道得好清楚。

11 如果我真係有過錯，而且做過該判死刑嘅事，我唔會拒絕受死。但係，如果佢哋控告我嗰啲事根本唔成立，就冇人可以將我交畀佢哋做人情。我向凱撒上訴！」

12 於是非斯都同顧問團商量過，就答：「你已經向凱撒上訴，你就會去凱撒嗰度。」

13 過咗幾日，亞基帕王同百妮基嚟到凱撒利亞，向非斯都問候。

14 佢哋喺嗰度留咗好幾日，期間非斯都就向王講起保羅嘅事，話：「有個囚犯，係腓力斯留低嘅。

15 我去耶路撒冷嗰陣，祭司長同猶太人嘅長老向我控告佢，要求判佢有罪。

16 我答佢哋，羅馬人嘅慣例係：被告要先同控告佢嘅人當面對質，亦都要有機會就指控為自己答辯。未做到呢兩樣，係唔會將人交出去做人情嘅。

17 所以，佢哋嚟到呢度之後，我一啲都冇拖延，第二日就坐上審判台，吩咐人帶嗰個人嚟。

18 控告佢嘅人企起身。我原本以為佢哋會控告保羅做咗啲惡事，但係呢類指控，佢哋一項都冇提出。

19 佢哋同保羅爭論嘅，係一啲關於佢哋自己宗教嘅問題，同埋一個叫耶穌、已經死咗嘅人。保羅話，耶穌係活嘅。

20 我唔知呢啲事應該點樣查，就問保羅，願唔願意去耶路撒冷，喺嗰度就呢啲事受審。

21 但保羅提出上訴，要求自己繼續畀人扣留，等皇帝裁決。我就吩咐人繼續扣留佢，直到我將佢送去凱撒嗰度。」

22 亞基帕對非斯都話：「我自己都想聽吓呢個人講嘢。」非斯都話：「聽日你就會聽到佢講嘢。」

23 第二日，亞基帕同百妮基嚟到，排場好大。佢哋同啲千夫長，同埋城中嘅顯要一齊入咗聽審廳。非斯都一吩咐，保羅就畀人帶咗入嚟。

24 非斯都話：「亞基帕王，同埋同我哋一齊喺度嘅各位先生，你哋睇吓呢個人。嗰班猶太人個個都向我控訴佢，無論喺耶路撒冷定係喺呢度，都大聲叫嚷，話唔應該再畀佢活落去。

25 但係我發現，佢冇做過任何該判死刑嘅事。既然係佢自己向皇帝提出上訴，我就決定將佢送去。

26 但係講到佢，我冇確實嘅資料可以寫畀皇帝陛下。所以我帶咗佢嚟你哋面前，尤其係你面前，亞基帕王，希望查問過之後，我就有嘢可以寫。

27 因為我覺得，將一個囚犯送去，但係唔交代對佢嘅指控，係唔合理嘅。」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。