使徒行傳 6章 — 粵讀聖經
更新：2026-10-08

1 嗰段日子，門徒越嚟越多。講希臘話嗰班門徒開始埋怨講希伯來話嗰班，因為每日供應生活所需嗰陣，講希臘話嗰邊啲寡婦一直畀人忽略。

2 十二個使徒就將門徒召集埋嚟，同佢哋講：「我哋放低傳講上帝說話嘅工作，去為人供應飯食，噉樣唔合適。

3 所以，各位弟兄，你哋喺自己當中揀七個有好名聲、滿有聖靈同智慧嘅男人出嚟，我哋就委派佢哋負責呢件事。

4 我哋就會專心祈禱，同埋傳講上帝嘅話嚟服侍人。」

5 大家都覺得呢個提議好，就揀咗司提反。佢係一個滿有信心同聖靈嘅人。佢哋揀嘅仲有腓利、伯羅哥羅、尼迦挪、提門、巴米拿，同埋尼哥拉。尼哥拉係安提阿人，入咗猶太教。

6 大家將呢七個人帶到使徒面前。使徒祈咗禱，就按手喺佢哋身上。

7 上帝嘅話傳得越嚟越廣，耶路撒冷嘅門徒人數大大增加，仲有一大班祭司順服呢個信仰。

8 司提反滿有恩典同能力，喺民眾當中行出大能嘅奇事同神蹟。

9 有啲人起嚟同司提反辯論。當中有啲人屬於人哋叫做「獲釋奴隸會堂」嗰間會堂，有古利奈人、亞歷山大人，亦都有從基利家同亞細亞嚟嘅人。

10 司提反憑住智慧同聖靈講嘅嘢，佢哋駁唔倒。

11 於是，佢哋暗中唆使幾個男人話：「我哋聽過佢講啲褻瀆摩西同上帝嘅說話。」

12 佢哋又煽動民眾、長老同經學家。呢班反對司提反嘅人走埋去捉住佢，將佢帶到公議會。

13 佢哋仲搵咗啲假證人出嚟。啲假證人話：「呢個人不停噉用說話攻擊神聖嘅地方同律法。

14 因為我哋聽過佢話，耶穌呢個拿撒勒人會拆毀呢個地方，仲會改變摩西傳落嚟畀我哋嘅習俗。」

15 坐喺公議會入面嘅人，全都定定噉望住司提反，見到佢塊面好似天使嘅面噉。

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。