約翰福音 10章 — 粵讀聖經
更新：2026-10-08

1 耶穌話：「我實實在在話畀你哋知，入羊圈唔經道門，反而由第二度爬入去嗰個，就係賊同強盜。

2 由道門入去嘅，先係啲羊嘅牧羊人。

3 睇門嗰個會開門畀佢，啲羊會聽佢嘅聲音。佢逐隻叫自己啲羊嘅名，帶佢哋出嚟。

4 佢帶晒自己啲羊出嚟之後，就行喺佢哋前面。啲羊跟住佢，因為認得佢嘅聲音。

5 佢哋絕對唔會跟陌生人，反而會走開避佢，因為唔認得陌生人嘅聲音。」

6 耶穌用呢個比喻同佢哋講，但係佢哋唔明佢講緊乜。

7 於是耶穌又對佢哋話：「我實實在在話畀你哋知，我就係羊嘅門。

8 所有喺我之前嚟嘅，都係賊同強盜，但係啲羊冇聽佢哋。

9 我就係道門。邊個經我入去，就會得救；佢會出出入入，搵到草食。

10 賊嚟，只係為咗偷、殺、毀滅；我嚟，就係要佢哋有生命，仲要有豐盛嘅生命。

11 我係好牧羊人。好牧羊人為啲羊捨命。

12 但係僱嚟嘅工人唔係牧羊人，啲羊又唔係佢嘅；佢一見到狼嚟，就丟低啲羊逃走。狼就搶走啲羊，將佢哋趕散。

13 嗰個人會逃走，係因為佢係僱嚟嘅工人，唔關心啲羊。

14 我係好牧羊人。我認識自己啲羊，自己啲羊亦都認識我，

15 就好似天父認識我，我亦都認識天父一樣。我為啲羊捨命。

16 我仲有其他羊，唔屬於呢個羊圈嘅。我都一定要帶領佢哋，佢哋會聽我嘅聲音，成為一群羊，由一個牧羊人牧養。

17 天父愛我，係因為我捨命，為咗再攞返自己條命。

18 冇人奪走我條命，係我自己甘願捨出嚟嘅。我有權柄捨命，亦都有權柄再攞返自己條命。呢個命令，係我由我天父嗰度領受嘅。」

19 嗰啲猶太人因為呢番話，又分裂咗。

20 佢哋當中好多人話：「佢鬼上身，發緊癲。你哋聽佢講嚟做乜？」

21 另有啲人話：「鬼上身嘅人唔會講呢啲話。唔通鬼可以開盲人嘅眼，令佢哋睇得見咩？」

22 嗰陣係冬天，耶路撒冷正喺度過獻殿節。

23 耶穌喺聖殿嘅所羅門廊行緊。

24 嗰啲猶太人就圍住佢，問：「你要我哋估估吓到幾時呀？如果你係基督，就清清楚楚講畀我哋聽啦。」

25 耶穌回答佢哋：「我已經講過畀你哋聽，但係你哋唔信。我奉我天父嘅名做嘅事，正係為我作證。

26 但係你哋唔信，因為你哋唔係我啲羊。

27 我啲羊聽我嘅聲音，我認識佢哋，佢哋亦都跟住我。

28 我賜永生畀佢哋，佢哋永遠都唔會滅亡，亦都冇人會喺我手上搶走佢哋。

29 講到我天父已經賜畀我嘅羊，天父比一切都大，冇人可以喺佢手上搶走佢哋。

30 我同天父係合一嘅。」

31 於是嗰啲猶太人又攞起石頭，要掟耶穌。

32 耶穌對佢哋話：「我畀你哋睇過好多出於我天父嘅好事。你哋係為咗邊一件，要用石頭掟我呢？」

33 嗰啲猶太人回答佢：「我哋唔係因為你做咗好事先掟你，係因為你褻瀆上帝。你明明係人，竟然自稱係上帝。」

34 耶穌回答佢哋：「你哋嘅律法入面，唔係寫住『我話過：你哋係神』咩？

35 經上嘅話係唔可以推翻嘅。上帝嘅話臨到嗰啲人；如果經上稱佢哋為『神』，

36 噉因為我講咗『我係上帝個仔』，你哋就話我褻瀆上帝咩？我係天父分別為聖、差嚟世間嗰個。

37 如果我唔做我天父嘅事，你哋就唔好信我。

38 但係如果我有做，就算你哋唔信我，都要信呢啲事，等你哋知道，亦都繼續明白，天父喺我裏面，我亦都喺天父裏面。」

39 於是佢哋又想捉耶穌，但係佢喺佢哋手上走甩咗。

40 耶穌又去到約旦河對岸，約翰起初施洗嗰個地方，留咗喺嗰度。

41 好多人嚟見佢，話：「約翰一個神蹟都冇行過，但係佢講過關於呢個人嘅一切，都係真嘅。」

42 嗰度有好多人信咗耶穌。

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。