約翰福音 13章 — 粵讀聖經
更新：2026-10-08

1 逾越節之前，耶穌知道佢離開呢個世界、去天父嗰度嘅時候到咗。佢一直愛世上屬於自己嗰班人，就愛佢哋到底。

2 食緊晚飯嗰陣，魔鬼已經將出賣耶穌嘅念頭放咗入加略人猶大心裏面。猶大係西門個仔。

3 耶穌知道天父已經將一切交喺佢手上，亦都知道自己係由上帝嗰度嚟，要返去上帝嗰度。

4 佢就喺飯席起身，除低外衣，攞咗條布巾圍喺腰度。

5 跟住，佢倒水落個盆，開始幫門徒洗腳，用圍喺腰嗰條布巾幫佢哋抹乾。

6 耶穌嚟到西門彼得嗰度，彼得問佢：「主呀，你幫我洗腳？」

7 耶穌答佢：「我做緊嘅事，你而家唔明，但係之後你就會明。」

8 彼得同佢講：「你永遠都唔可以幫我洗腳！」
耶穌答佢：「如果我唔幫你洗，你就冇份同我一齊喇。」

9 西門彼得同佢講：「主呀，噉唔好淨係洗我對腳，連我對手同個頭都洗埋啦！」

10 耶穌同佢講：「沖咗涼嘅人，全身都已經乾淨，淨係對腳要洗。你哋係乾淨嘅，不過，唔係個個都係。」

11 耶穌知道邊個會出賣佢，所以先話：「你哋唔係個個都乾淨。」

12 耶穌幫佢哋洗完腳，着返外衣，斜靠返喺飯席度，就同佢哋講：「你哋明唔明我為你哋做咗啲乜？

13 你哋叫我『老師』，又叫我『主』，叫得啱，因為我就係。

14 既然我呢個做主、做老師嘅都幫你哋洗咗腳，你哋亦都應該互相洗腳。

15 因為我畀咗個榜樣你哋，等你哋照住我為你哋做嘅去做。

16 我實實在在話畀你哋知，奴僕嘅地位唔會高過佢主人；受差派嘅人，地位亦都唔會高過差佢嗰個人。

17 你哋如果知道呢啲事，照住去做，就有福喇。

18 我呢番話唔係講你哋全部人。我知道自己揀選咗邊啲人。不過，呢件事係要應驗聖經上嘅話：『食我嘅餅嗰個人，舉起咗腳踭嚟對付我。』

19 件事仲未發生，我而家就話畀你哋知，等件事發生嗰陣，你哋會信我就係嗰位。

20 我實實在在話畀你哋知，無論我差邊個去，接納嗰個人，就係接納我；接納我，就係接納差我嚟嗰位。」

21 耶穌講完呢啲話，心裏面好唔安樂，就鄭重講：「我實實在在話畀你哋知，你哋當中，有一個會出賣我。」

22 門徒就你眼望我眼，唔知耶穌講緊邊個。

23 有個耶穌所愛嘅門徒，斜靠喺耶穌身邊食飯，貼近佢胸前。

24 西門彼得就向呢個門徒示意，要佢問耶穌講緊邊個。

25 嗰個門徒就順勢挨向耶穌胸前，問佢：「主呀，係邊個？」

26 耶穌回答：「我將呢一小塊餅浸一浸，再遞畀邊個，嗰個就係喇。」
跟住，佢將嗰一小塊餅浸咗一浸，遞畀加略人西門個仔猶大。

27 嗰塊餅遞過去之後，撒但就入咗猶大裏面。
耶穌同猶大講：「你做緊嘅事，快啲做啦。」

28 同席食飯嘅人，冇一個明白耶穌點解同猶大噉講。

29 因為猶大管住個錢箱，有啲人以為耶穌叫佢買啲大家過節要用嘅嘢，又或者攞啲嘢畀窮人。

30 猶大攞咗嗰塊餅，就即刻出去。
嗰陣係夜晚。

31 猶大出去之後，耶穌就話：「而家人子得到榮耀喇，上帝亦都喺人子身上得到榮耀喇。

32 如果上帝已經喺人子身上得到榮耀，上帝亦都會喺自己身上畀人子榮耀，而且會即刻畀佢榮耀。

33 我親愛嘅仔女，我同你哋一齊嘅時間，仲剩返一陣。你哋會搵我。我以前同嗰啲猶太人講過：『我去嘅地方，你哋嚟唔到。』而家我都同你哋噉講。

34 我畀你哋一條新命令：你哋要彼此相愛。我點樣愛你哋，你哋都要點樣彼此相愛。

35 如果你哋彼此相愛，個個就會憑呢一點認得出你哋係我嘅門徒。」

36 西門彼得問佢：「主呀，你去邊度？」
耶穌答佢：「我去嘅地方，你而家唔可以跟住我去，但係之後你會跟住我。」

37 彼得問：「主呀，點解我而家唔可以跟住你去？我會為你捨命！」

38 耶穌答：「你會為我捨命？我實實在在話畀你知，雞都未叫，你就會否認我三次。」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。