路加福音 6章 — 粵讀聖經 更新：2026-10-08 1 有一個安息日，耶穌行過田地。佢嘅門徒一路摘穀穗，用手搓出啲穀粒嚟食。 2 有啲法利賽人話：「你哋點解做安息日唔准做嘅事？」 3 耶穌回答佢哋話：「大衛同佢身邊嘅人肚餓嗰陣，佢做過啲乜，你哋連呢件事都未讀過咩？ 4 佢入咗上帝嘅殿，攞咗擺喺上帝面前嘅餅嚟食，仲分畀同佢一齊嘅人食。嗰啲餅，除咗祭司，其他人都唔准食㗎。」 5 耶穌又對佢哋話：「人子係安息日嘅主。」 6 另一個安息日，耶穌入會堂教導人。嗰度有個人，右手萎縮咗。 7 經學家同法利賽人留意住耶穌，睇吓佢會唔會喺安息日醫人，好搵機會控告佢。 8 但耶穌知道佢哋心裏面諗緊乜，就對嗰個手萎縮咗嘅人話：「起身，企喺中間。」嗰個人就起身，企咗喺嗰度。 9 耶穌對佢哋話：「我問你哋，安息日容許做好事，定係做壞事？救人條命，定係害人條命？」 10 佢望勻晒佢哋，跟住對嗰個人話：「伸隻手出嚟。」嗰個人照做，隻手就好返喇。 11 佢哋就嬲到失晒理智，互相商量可以點樣對付耶穌。 12 嗰段日子，耶穌有一次出去上山祈禱，成晚向上帝祈禱。 13 天光之後，佢叫啲門徒過嚟，喺佢哋當中揀咗十二個，仲稱佢哋為使徒。 14 佢哋係西門（耶穌又幫佢改名叫彼得），同埋西門嘅兄弟安得烈、雅各、約翰、腓力、巴多羅買， 15 馬太、多馬、亞勒腓個仔雅各，被稱為奮銳者嘅西門， 16 雅各個仔猶大，同埋加略人猶大，佢後來背叛咗耶穌。 17 耶穌同佢哋一齊落山，企喺一個平坦嘅地方。嗰度有好多佢嘅門徒，亦有一大群人，由猶太各處、耶路撒冷，同推羅、西頓沿海一帶嚟。 18 佢哋係嚟聽佢講嘢，同埋希望身上嘅病得到醫治。受污穢嘅靈困擾嘅人，亦得到醫治。 19 所有人都想摸到佢，因為有能力由佢身上發出嚟，醫好晒所有人。 20 耶穌抬起眼，望住門徒，話：「你哋窮嘅人有福喇，因為上帝嘅國係你哋嘅。 21 你哋而家捱餓嘅人有福喇，因為你哋會食得飽。你哋而家喊緊嘅人有福喇，因為你哋會笑。 22 人哋因為人子而憎你哋、排斥你哋、辱罵你哋，仲覺得連你哋嘅名都邪惡，將佢唾棄，嗰陣你哋有福喇。 23 到嗰日，你哋要開心，歡喜到跳起嚟，因為你哋喺天上嘅賞賜好大！佢哋啲祖先，以前都係噉樣對待先知。 24 不過，你哋有錢嘅人有禍喇，因為你哋嗰份安慰，已經得到晒喇。 25 你哋而家食得飽嘅人有禍喇，因為你哋會捱餓。你哋而家笑緊嘅人有禍喇，因為你哋會哀傷，會喊。 26 如果個個都讚你哋，你哋就有禍喇，因為佢哋啲祖先，以前都係噉樣對待假先知。 27 不過，你哋聽緊我講嘢嘅人，我要同你哋講：要愛你哋嘅敵人，善待憎你哋嘅人， 28 為咒詛你哋嘅人祝福，為欺負你哋嘅人祈禱。 29 有人打你一邊面，另一邊都畀佢打；有人攞你件外衣，連裏面嗰件衫，都唔好阻止佢攞。 30 無論邊個問你要嘢，你都要畀；有人攞咗你嘅嘢，唔好問佢攞返。 31 你哋想人哋點樣對你哋，你哋就照樣對人。 32 如果你哋只係愛嗰啲愛你哋嘅人，有乜值得讚呢？連罪人都會愛嗰啲愛佢哋嘅人啦。 33 如果你哋只係善待嗰啲善待你哋嘅人，有乜值得讚呢？連罪人都係噉做啦。 34 如果你哋只係借畀嗰啲你哋指望會還返嘅人，有乜值得讚呢？連罪人都會借畀罪人，希望收返同樣嘅數。 35 不過，你哋要愛敵人，做好事，借畀人，唔好指望收返。噉樣，你哋嘅賞賜就會好大，你哋會成為至高上帝嘅仔女，因為佢連唔知感恩嘅人同惡人，都善待佢哋。 36 你哋要憐憫人，好似你哋嘅天父憐憫人噉。 37 唔好審判人，你哋就一定唔會受審判；唔好定人罪，你哋就一定唔會被定罪。饒恕人，你哋就會得到饒恕。 38 你哋要畀人，就會有嘢畀返你哋。人哋會用十足嘅份量，壓實、搖實、滿到瀉，倒落你哋兜起嘅衫襟度。因為你哋用乜嘢尺度量畀人，就會用返同一個尺度量畀你哋。」 39 耶穌又同佢哋講咗個比喻：「盲人點可以帶盲人行路呢？兩個唔係都會跌落坑咩？ 40 學生唔會高過老師。不過，凡係受過完整訓練嘅，都會好似自己嘅老師噉。 41 你點解見到弟兄眼裏面嗰粒木屑，自己眼裏面嗰條大樑就冇留意呢？ 42 你自己連眼裏面嗰條大樑都睇唔見，又點可以同弟兄講：『弟兄，等我幫你攞走你眼裏面嗰粒木屑啦。』你呢個假冒為善嘅人，先攞走自己眼裏面嗰條大樑，之後你就睇得清楚，可以攞走弟兄眼裏面嗰粒木屑。 43 好樹唔會結壞果子，壞樹亦唔會結好果子。 44 每棵樹，都可以從佢結嘅果子認出嚟。冇人會喺荊棘叢摘無花果，亦唔會喺刺叢摘葡萄。 45 好人會由心裏面積存嘅好嘢，帶出好嘢；惡人就會由心裏面嘅壞嘢，帶出壞嘢。因為一個人心裏面充滿啲乜，個口就講啲乜。 46 你哋點解叫我『主呀，主呀』，但又唔照我講嘅去做呢？ 47 凡係嚟我呢度，聽到我嘅話，又照住做嘅人，我話畀你哋知佢似乜： 48 佢好似一個起屋嘅人，挖地，挖到好深，將地基打喺岩石上。發洪水嗰陣，河水衝埋間屋度，但搖都搖唔郁佢，因為間屋起得好。 49 但聽到又唔做嘅人，就好似一個喺地面起屋、冇打地基嘅人。河水一衝埋去，間屋即刻冧咗，冧得好厲害。」 粵讀聖經 · Can Read Bible 本站原創粵語譯文：CC BY-NC-SA 4.0 https://creativecommons.org/licenses/by-nc-sa/4.0/ 引用時請附書卷章節、來源網址；有修改請註明。第三方內容保留原有授權。