馬可福音 1章 — 粵讀聖經
更新：2026-10-08

1 關於耶穌基督嘅福音，係噉樣開始嘅。

2 正如先知以賽亞嘅書上寫住：「睇吓，我派我嘅使者行喺你前面，佢會為你預備好條路。

3 有把聲喺曠野呼喊：『預備好主嘅路，將佢啲路修直！』」

4 施洗約翰出現喺曠野，傳道叫人悔改、接受洗禮，好使罪得到赦免。

5 猶太全境嘅人，同埋耶路撒冷所有居民，都出去搵佢。佢哋承認自己嘅罪，喺約旦河接受約翰嘅洗禮。

6 約翰着住駱駝毛做嘅衫，腰度綁住皮帶，食嘅係蝗蟲同野生嘅蜜糖。

7 佢傳講：「喺我之後嚟嗰位，比我更有能力。我連彎低身，幫佢解鞋帶都唔配。

8 我用水同你哋施咗洗；佢就會用聖靈同你哋施洗。」

9 嗰段日子，耶穌由加利利嘅拿撒勒嚟，喺約旦河接受約翰嘅洗禮。

10 耶穌一由水入面上嚟，就見到天裂開咗，聖靈好似隻鴿子噉降落喺佢身上。

11 有把聲由天上傳嚟：「你係我心愛嘅仔，我對你好滿意。」

12 聖靈即刻驅使耶穌去曠野。

13 耶穌喺曠野四十日，受撒但試探。佢同野獸喺一齊，有天使服侍佢。

14 約翰畀人拉咗之後，耶穌嚟到加利利，傳講上帝嘅福音，

15 話：「時候已經到喇，上帝作王掌權嘅國已經近喇！你哋要悔改，要信福音！」

16 耶穌沿住加利利海邊行，見到西門同佢兄弟安得烈喺海度撒網。佢哋係漁夫。

17 耶穌對佢哋話：「嚟跟住我啦！我會令你哋成為聚集人嘅漁夫。」

18 佢哋即刻放低啲漁網，跟住耶穌。

19 耶穌再行前少少，見到西庇太個仔雅各，同雅各嘅兄弟約翰。佢哋都喺船上整理緊漁網。

20 耶穌即刻叫佢哋嚟。佢哋就留低爸爸西庇太同啲受僱工人喺船上，跟咗耶穌。

21 佢哋入咗迦百農。到安息日，耶穌就即刻喺會堂教導人。

22 大家聽到佢嘅教導，都好驚訝，因為佢教人嗰陣，好似有權柄嘅人噉，同啲教律法嘅文士唔同。

23 就喺嗰陣，佢哋嘅會堂入面，有個畀污靈附住嘅人，大聲嗌：

24 「拿撒勒嘅耶穌，你做乜干涉我哋？你係咪嚟毀滅我哋？我知道你係邊個，你係上帝嘅聖者！」

25 耶穌斥責個污靈：「收聲！由呢個人身上出嚟！」

26 個污靈令嗰個人抽搐，仲大聲嗌叫，然後就由嗰個人身上出咗嚟。

27 大家都好震驚，互相問：「呢啲係乜嘢？係新嘅教導呀！佢有權柄，命令啲污靈，連佢哋都聽佢嘅話！」

28 有關耶穌嘅消息即刻四圍傳開，傳遍加利利一帶。

29 佢哋一離開會堂，就同雅各、約翰一齊，去西門同安得烈屋企。

30 西門嘅岳母瞓喺度，發緊燒，佢哋即刻將佢嘅情況話畀耶穌知。

31 耶穌走埋去，捉住佢隻手，扶佢起身。佢退咗燒，就服侍佢哋。

32 到咗傍晚，太陽落咗山，人哋將所有有病嘅人，同畀鬼附身嘅人，都帶嚟耶穌度。

33 全城嘅人都聚咗喺門口。

34 耶穌醫好咗好多患唔同病嘅人，又趕走咗好多鬼。佢唔畀啲鬼講嘢，因為啲鬼認識佢。

35 一大清早，天都未光，耶穌就起身出咗去，去到一個偏僻嘅地方，喺嗰度祈禱。

36 西門同佢啲同伴就追去搵耶穌，

37 搵到佢，就話：「大家都搵緊你呀！」

38 耶穌對佢哋話：「我哋去附近其他村鎮啦，等我喺嗰度都傳道。因為我出嚟，就係為咗呢件事。」

39 耶穌走遍加利利，喺各地嘅會堂傳道，亦都趕鬼。

40 有個患麻瘋病嘅人嚟搵耶穌，跪低求佢話：「如果你願意，你可以醫好我，令我成為潔淨嘅人。」

41 耶穌嬲咗，伸手摸佢，話：「我願意。潔淨返啦！」

42 嗰個人嘅麻瘋病即刻好返，佢潔淨咗。

43 耶穌嚴厲噉警告佢，即刻打發佢走，

44 對佢話：「記住，呢件事，一句都唔好同任何人講！但係，你要去畀祭司檢查，再照摩西嘅吩咐，為你嘅潔淨獻上祭物，用嚟畀佢哋作個證明。」

45 但嗰個人出去之後，就開始四圍講，將成件事傳開。結果耶穌冇辦法再公開入城，就留喺城外啲偏僻地方。但係啲人仍然由四面八方嚟搵佢。

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。