馬可福音 3章 — 粵讀聖經
更新：2026-10-08

1 耶穌又入咗會堂。嗰度有個人，一隻手萎縮咗。

2 有人留意住耶穌，睇吓佢會唔會喺安息日醫嗰個人，好搵機會控告佢。

3 耶穌對嗰個手萎縮咗嘅人話：「起身，嚟中間呢度。」

4 跟住，佢問嗰啲人：「喺安息日，准人做好事，定係做壞事？救人一命，定係殺人？」但係佢哋一直唔出聲。

5 耶穌帶住怒氣，望咗一圈四周嗰啲人，又因為佢哋心硬而難過，就對嗰個人話：「伸隻手出嚟。」嗰個人伸咗隻手出嚟，隻手就好返。

6 法利賽人出去之後，即刻同希律嗰一派嘅人商量，點樣先可以殺死耶穌。

7 耶穌同佢嘅門徒退到海邊，有一大群加利利人跟住佢。仲有猶太、

8 耶路撒冷、以土買、約旦河另一邊，同推羅、西頓一帶嘅人，聽到佢所做嘅事，就有好多人嚟搵佢。

9 因為人多，耶穌吩咐門徒準備一隻小船，隨時畀佢用，免得人群逼住佢。

10 因為佢醫好咗好多人，所有受病痛折磨嘅人都逼埋嚟，要摸佢。

11 啲污靈每次見到耶穌，都伏喺佢面前，大聲嗌：「你係上帝嘅兒子！」

12 耶穌一再嚴厲噉警告佢哋，唔准公開佢嘅身分。

13 耶穌上咗山，叫佢自己想叫嘅人過嚟，佢哋就嚟到佢身邊。

14 佢任命咗十二個人，要佢哋同自己喺一齊，亦要差佢哋出去傳道，

15 仲要畀佢哋趕鬼嘅權柄。

16 佢任命嘅十二個人，有西門，耶穌幫佢改名叫彼得；

17 有西庇太個仔雅各，同雅各嘅兄弟約翰，耶穌幫佢哋起咗個名叫半尼其，意思係「雷嘅兒子」；

18 仲有安得烈、腓力、巴多羅買、馬太、多馬、亞勒腓個仔雅各、達太、稱為「熱心者」嘅西門，

19 同加略人猶大，亦即係出賣耶穌嗰個人。

20 耶穌入咗一間屋。人群又聚埋嚟，逼到佢同門徒連飯都食唔到。

21 佢嘅親屬聽到呢件事，就出嚟，要捉住佢，因為佢哋話：「佢癲咗。」

22 由耶路撒冷落嚟嘅文士，即係教律法嘅人，話：「佢畀別西卜附住。」又話：「佢靠鬼王嘅能力趕鬼。」

23 耶穌叫佢哋過嚟，用比喻同佢哋講：「撒但點可以趕走撒但呢？

24 如果一個國自己內部爭鬥分裂，嗰個國就企唔住。

25 如果一家人自己內部爭鬥分裂，嗰個家都會企唔住。

26 如果撒但起嚟反對自己，分裂咗，佢就企唔住，而係走到盡頭喇。

27 不過，冇人可以入一個大力嘅人屋企，搶走佢啲財物，除非先綁住嗰個人。綁住咗，先可以搶佢屋企啲嘢。

28 我實實在在話畀你哋知，無論人犯乜嘢罪，講乜嘢侮辱、褻瀆嘅話，全部都會得到赦免。

29 但係，邊個褻瀆聖靈，邊個就永遠唔會得到赦免，而係要永遠背負住呢個罪。」

30 耶穌噉講，係因為嗰啲文士一直話：「佢畀污靈附住。」

31 耶穌嘅阿媽同兄弟嚟到，企喺出面，託人入去叫佢。

32 有一群人圍住耶穌坐。佢哋話畀佢知：「你阿媽同你啲兄弟喺出面搵緊你呀。」

33 耶穌回答佢哋：「邊個係我阿媽？邊啲係我兄弟？」

34 佢望咗一圈圍住自己坐嘅人，話：「你哋睇，呢啲就係我阿媽、我兄弟。

35 因為，邊個照上帝嘅心意去做，邊個就係我兄弟、我姊妹、我阿媽。」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。