馬可福音 8章 — 粵讀聖經
更新：2026-10-08

1 嗰段日子，又有一大群人聚埋嚟，佢哋冇嘢食。耶穌叫門徒過嚟，對佢哋話：

2 「我憐憫呢班人，因為佢哋留喺我身邊已經三日，依家冇嘢食。

3 如果我叫佢哋餓住肚返屋企，佢哋會喺路上暈低。而且，佢哋當中有啲係由好遠嘅地方嚟。」

4 門徒答佢：「呢度咁偏僻，邊度搵得到餅，畀咁多人食飽呢？」

5 耶穌問：「你哋有幾多個餅？」佢哋答：「七個。」

6 耶穌吩咐人群坐低喺地上，攞起嗰七個餅，感謝過之後，就擘開，不斷交畀門徒，等佢哋分畀眾人；門徒就分咗畀眾人。

7 佢哋仲有幾條小魚。耶穌為啲魚祝福咗，叫門徒亦都分畀眾人。

8 大家都食咗，而且食飽晒。佢哋將剩低嘅碎塊收拾起嚟，裝咗七個筐。

9 嗰度大約有四千人。耶穌叫佢哋散去，

10 即刻同門徒上船，嚟到大瑪努他一帶。

11 法利賽人出嚟，開始同耶穌辯論，要求佢顯個由天上嚟嘅神蹟，試探佢。

12 耶穌喺心裏深深噉歎咗一口氣，話：「呢個世代點解要求神蹟？我實實在在話畀你哋知，絕對唔會有神蹟畀呢個世代！」

13 佢離開佢哋，又上船，去對岸。

14 門徒唔記得帶餅，船上除咗一個餅，就冇其他餅。

15 耶穌警告佢哋：「留意！你哋要提防法利賽人嘅酵母，同希律嘅酵母。」

16 佢哋就互相議論冇餅呢件事。

17 耶穌知道，就問佢哋：「你哋點解議論冇餅？你哋到而家都仲未領會，仲未明白咩？你哋嘅心硬咗咩？

18 有眼都睇唔見，有耳都聽唔到？你哋唔記得，

19 我擘開五個餅畀五千人嗰陣，你哋執返啲餅碎，裝滿咗幾多個籃？」佢哋答：「十二個。」

20 耶穌又問：「仲有，七個餅畀四千人嗰次，你哋執返啲餅碎，裝滿咗幾多個筐？」佢哋答：「七個。」

21 耶穌對佢哋話：「你哋仲未明白咩？」

22 佢哋嚟到伯賽大。有人帶咗個失明嘅人嚟搵耶穌，求佢摸吓嗰個人。

23 耶穌拖住佢隻手，帶佢出村，吐咗啖口水喺佢眼上面，再將雙手按喺佢身上，問：「你有冇睇到啲乜嘢？」

24 嗰個人抬頭望，話：「我睇到人，佢哋好似樹噉，但係行緊。」

25 跟住，耶穌再將雙手按喺佢雙眼上面。佢就睇得清，視力恢復咗，樣樣嘢都睇得清清楚楚。

26 耶穌叫佢返自己屋企，話：「連條村都唔好入。」

27 耶穌同門徒出發，去凱撒利亞腓立比一帶嘅村。路上，佢問門徒：「人哋話我係邊個？」

28 佢哋答：「有人話係施洗約翰，有人話係以利亞，仲有人話係先知其中一個。」

29 耶穌問佢哋：「噉你哋呢？你哋話我係邊個？」彼得答：「你係基督。」

30 耶穌嚴厲噉吩咐佢哋，唔好將佢嘅身分話畀任何人知。

31 耶穌開始教導佢哋，人子必須受好多苦，被長老、祭司長同文士拒絕，被殺，三日之後復活。

32 呢啲事，耶穌講得明明白白。彼得就帶佢行埋一邊，開始責備佢。

33 耶穌轉過身，望住門徒，責備彼得，話：「撒但，退到我後面去！因為你諗嘅唔係上帝嘅事，而係人嘅事。」

34 耶穌叫人群同門徒一齊過嚟，對佢哋話：「如果有人想跟喺我後面，就要放低自己作主嘅要求，孭起自己嘅十字架，跟住我。

35 因為，邊個想保住自己嘅生命，就會失去生命；但邊個為咗我同福音而失去生命，就會保住生命。

36 人就算賺到成個世界，但賠咗自己嘅生命，有乜好處呢？

37 人又可以攞乜嘢嚟換自己嘅生命呢？

38 喺呢個淫亂、罪惡嘅世代，邊個以我同我嘅說話為恥，人子帶住自己父親嘅榮耀，同聖潔嘅天使一齊嚟嗰陣，亦都會以嗰個人為恥。」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。