馬太福音 20章 — 粵讀聖經
更新：2026-10-05

葡萄園嘅工人

1 「因為天國就好似有個園主，一朝早出去請工人，去佢嘅葡萄園做嘢。

2 佢同啲工人講好，做一日，每人收一個第納流，跟住就叫佢哋去自己嘅葡萄園。

3 大約朝早九點，佢又出去，見到仲有啲人企喺市集，冇嘢做。

4 佢就同佢哋講：『你哋都去我個葡萄園做嘢啦。我會畀你哋公道嘅工錢。』

5 佢哋就去咗。大約中午十二點，同埋下晝三點，園主又出去，照樣請人。

6 大約下晝五點，佢再出去，見到仲有啲人企喺度，就問佢哋：『你哋點解喺呢度企足成日，都冇嘢做嘅？』

7 佢哋答：『因為冇人請我哋囉。』園主就話：『你哋都去我個葡萄園做嘢啦。』

8 到咗傍晚，園主同佢個管工講：『叫啲工人嚟出糧，由最後嚟嗰啲開始，一路派到最先嚟嗰啲。』

9 大約下晝五點先嚟做嘢嗰啲工人過嚟，每人都收到一個第納流。

10 輪到最先嚟嗰啲，佢哋以為自己會收多啲，點知都係每人收到一個第納流。

11 佢哋收咗錢，就埋怨園主，

12 話：『最後嚟嗰啲，只係做咗一個鐘！我哋辛辛苦苦做足成日，又要捱熱，你竟然畀佢哋同我哋一樣咁多！』

13 園主就答佢哋其中一個：『朋友，我冇對你唔公平喎。你唔係同我講好，收一個第納流咩？

14 攞返你份工錢，走啦。我想畀呢個最後嚟嘅人，同你一樣咁多。

15 我自己嘅錢，我想點用，唔通唔得咩？定係見我對人好，你就眼紅呀？』

16 所以，排最後嘅就會排第一；排第一嘅就會排最後。」

耶穌再講自己將會受死

17 耶穌上耶路撒冷嗰陣，帶開嗰十二個門徒，喺路上私下同佢哋講：

18 「聽住，我哋而家上耶路撒冷。人子會畀人交到祭司長同經學家手上，佢哋會判佢死刑，

19 再將佢交畀外族人，等嗰啲人嘲笑佢、用鞭打佢，同埋將佢釘上十字架。到第三日，佢會復活。」

想做大，就要服侍人

20 嗰陣，西庇太嗰兩個仔嘅阿媽，帶埋兩個仔行到耶穌面前，向佢下拜，有嘢想求佢。

21 耶穌問佢：「你想要乜嘢？」佢話：「請你答應我，喺你嘅國入面，畀我呢兩個仔，一個坐喺你右邊，一個坐喺你左邊。」

22 耶穌答：「你哋唔知自己求緊乜嘢。我就嚟要飲嘅杯，你哋飲唔飲得落？」兩兄弟答佢：「飲得落。」

23 耶穌同佢哋講：「我嘅杯，你哋會飲。不過，我左右兩邊嘅位，唔係由我畀人坐嘅。我爸爸為邊啲人預備咗，嗰啲位就係佢哋嘅。」

24 其餘十個門徒聽到，就嬲咗嗰兩兄弟。

25 耶穌叫佢哋埋嚟，話：「你哋知道，外族人嘅統治者騎住佢哋嘅人民，嗰啲有權有勢嘅人，亦都用權力壓住佢哋。

26 你哋之間唔會係噉嘅。你哋邊個想做大，就要做你哋嘅僕人；

27 邊個想排第一，就要做你哋嘅奴隸。

28 就好似人子，佢嚟唔係要人服侍，係嚟服侍人，仲要交出自己條命，做贖金，換返好多人。」

兩個盲人睇得見

29 耶穌佢哋離開耶利哥嗰陣，有一大班人跟住佢。

30 有兩個盲人坐喺路邊，聽到耶穌經過，就大聲嗌：「主呀，大衛嘅子孫呀，可憐下我哋啦！」

31 嗰班人鬧佢哋，叫佢哋收聲。佢哋反而嗌得更大聲：「主呀，大衛嘅子孫呀，可憐下我哋啦！」

32 耶穌停低，叫佢哋，問：「你哋想我幫你哋做乜嘢？」

33 佢哋答：「主呀，我哋想對眼睇得見！」

34 耶穌可憐佢哋，就摸佢哋嘅眼。佢哋即刻睇得見，之後就跟住耶穌行。

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。