馬太福音 23章 — 粵讀聖經
更新：2026-10-05

1 嗰陣，耶穌對群眾同佢嘅門徒講：

2 「熟讀聖經嘅文士，同埋法利賽人，坐喺摩西嘅位上教人。

3 所以，佢哋話畀你哋知要做嘅，你哋都要照做、遵守。不過，唔好學佢哋嘅做法，因為佢哋得個講字，自己就唔做。

4 佢哋綁好一捆捆重擔，擺上人哋膊頭，自己就連用一隻手指郁下啲重擔都唔肯。

5 佢哋做乜都係要畀人睇。所以，佢哋將身上戴住、裝經文嘅盒整闊啲，衫邊嘅流蘇又整大啲。

6 佢哋鍾意出席宴會嗰陣坐上座，去到會堂又坐最尊貴嘅位；

7 又鍾意人哋喺街市向佢哋問好，叫佢哋做『拉比』，即係老師。

8 但係你哋唔好畀人叫做『拉比』，因為你哋只有一位老師，而你哋全部都係兄弟姊妹。

9 亦唔好叫地上任何人做你哋嘅『父親』，因為你哋只有一位父親，就係天上嗰位。

10 你哋亦唔好畀人叫做『導師』，因為你哋只有一位導師，就係基督。

11 你哋當中最有地位嗰個，要做服侍你哋嘅人。

12 邊個抬高自己，邊個就會畀貶低；邊個放低自己，邊個就會畀抬高。

13 但係，你哋呢啲文士同法利賽人，咁虛偽，有禍喇！你哋當住人面閂埋天國道門，自己唔入去，連想入去嘅人，你哋都唔畀佢哋入。

15 你哋呢啲文士同法利賽人，咁虛偽，有禍喇！你哋水路陸路都走遍，只為咗令一個人入猶太教；等佢入咗教，你哋就令佢變成地獄之子，比你哋仲衰一倍。

16 你哋呢啲盲咗眼嘅帶路人，有禍喇！你哋話：『指住聖所發誓，唔算數；但係指住聖所入面嘅金發誓，就一定要守誓。』

17 你哋又蠢又盲！究竟邊樣先至重要？係啲金，定係令啲金成為聖潔嘅聖所？

18 你哋又話：『指住祭壇發誓，唔算數；但係指住祭壇上面嘅祭物發誓，就一定要守誓。』

19 你哋真係盲咗！究竟邊樣先至重要？係祭物，定係令祭物成為聖潔嘅祭壇？

20 所以，指住祭壇發誓，就係指住祭壇同上面所有嘢發誓；

21 指住聖所發誓，就係指住聖所同住喺入面嗰位發誓；

22 指住天發誓，就係指住上帝嘅寶座，同坐喺寶座上面嗰位發誓。

23 你哋呢啲文士同法利賽人，咁虛偽，有禍喇！你哋連薄荷、蒔蘿同孜然呢啲香料，都會攞十分之一出嚟奉獻；但係律法入面更重要嘅事，你哋就擺埋一邊：做人要公正、有憐憫、忠誠可靠。呢啲係你哋應該做嘅，十分之一嘅奉獻亦唔可以唔做。

24 你哋呢啲盲咗眼嘅帶路人，連隻蚊都要隔走，反而將成隻駱駝吞落肚！

25 你哋呢啲文士同法利賽人，咁虛偽，有禍喇！你哋洗乾淨個杯同隻碟嘅外面，但係入面裝滿咗搶奪同放縱。

26 你呢個盲咗眼嘅法利賽人，先洗乾淨個杯同隻碟嘅入面啦，噉樣個杯外面都會乾淨。

27 你哋呢啲文士同法利賽人，咁虛偽，有禍喇！你哋好似啲搽咗白灰嘅墳墓，外面睇落好靚，但係入面裝滿死人骨頭同各種污穢嘅嘢。

28 你哋都係一樣：人哋睇你哋外表，覺得你哋好正直；但係你哋入面滿晒虛偽同違背律法嘅嘢。

29 你哋呢啲文士同法利賽人，咁虛偽，有禍喇！你哋為先知起墳墓，又將義人嘅墓裝飾得靚靚哋，

30 仲話：『如果我哋活喺祖先嗰個年代，就一定唔會同佢哋一齊殺害先知、流先知嘅血。』

31 你哋噉講，就係自己作證，承認自己係殺害先知嗰啲人嘅後代。

32 噉你哋就接住祖先做落去，湊滿佢哋嗰份罪惡啦！

33 你哋呢啲蛇、毒蛇嘅後代，點逃得過落地獄嘅判決？

34 所以，聽住，我差派先知、有智慧嘅人，同埋文士去你哋嗰度。當中有啲會畀你哋殺害、釘十字架；有啲會畀你哋喺你哋嘅會堂入面用鞭嚟打，仲由一個城追逼到另一個城。

35 噉樣，地上流過嘅所有義人嘅血，都要算喺你哋頭上：由義人亞伯嘅血，一直到巴拉加個仔撒迦利亞嘅血。撒迦利亞就係你哋喺聖所同祭壇中間殺害嗰個。

36 我實在話畀你哋知，呢一切都會落喺呢一代人身上。

37 耶路撒冷呀，耶路撒冷！你殺害先知，又用石頭掟死派到你呢度嘅人。我幾多次想聚埋你嘅兒女，好似母雞將自己啲雞仔聚埋喺翼底噉，但係你哋唔肯！

38 睇吓，你哋個家就噉畀撇低，留返畀你哋，荒涼一片。

39 因為我話畀你哋知，由而家開始，你哋一定唔會再見到我，直到你哋話：『奉主嘅名而嚟嗰位，係蒙福嘅！』」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。