馬太福音 28章 — 粵讀聖經
更新：2026-10-05

1 安息日過咗，一個禮拜嘅第一日，天啱啱光，抹大拉嘅馬利亞同另一個馬利亞去睇墳墓。

2 突然發生咗大地震。原來有主嘅天使從天上落嚟，走近，碌開嗰塊石，坐喺石上面。

3 佢個樣好似閃電，身上啲衫白得好似雪噉。

4 守衞驚佢，驚到震晒，好似死人噉。

5 天使對嗰啲女人話：「你哋唔使驚，我知道你哋搵緊嗰個畀人釘十字架嘅耶穌。

6 佢唔喺呢度，因為佢已經復活喇，正如佢講過嘅一樣。嚟睇吓，呢度就係原本放住佢嘅地方。

7 你哋快啲去話畀佢啲門徒知：『耶穌已經由死人當中復活喇，佢先你哋一步去加利利，你哋會喺嗰度見到佢。』我已經話咗畀你哋知喇。」

8 佢哋又驚又好開心，急急離開墳墓，跑去話畀耶穌嘅門徒知。

9 耶穌迎面遇到佢哋，話：「你哋好呀！」佢哋走上前，攬住耶穌嘅雙腳，拜佢。

10 耶穌對佢哋話：「唔好驚。你哋去話畀我啲弟兄知，叫佢哋去加利利，佢哋會喺嗰度見到我。」

11 嗰啲女人仲喺途中，有啲守衞入城，將發生嘅所有事話畀祭司長知。

12 祭司長同長老聚埋一齊，商量之後，就畀咗啲士兵一大筆錢，

13 話：「你哋要話：『我哋瞓緊覺嗰陣，佢啲門徒喺夜晚嚟，偷走咗佢。』

14 如果總督聽到呢件事，我哋會說服佢，等你哋唔使擔心。」

15 士兵收咗錢，就照佢哋教嘅去做。呢個講法喺猶太人當中，一直流傳到今日。

16 十一個門徒去咗加利利，去到耶穌指定佢哋去嗰座山。

17 佢哋見到耶穌，就拜佢，但係佢哋當中有啲人就有疑惑。

18 耶穌走埋嚟，對佢哋話：「天上地下所有權力，都已經畀晒我喇。

19 所以，你哋要去，帶領所有民族嘅人做我嘅門徒，為佢哋施洗，歸入父、子同聖靈嘅名下。

20 我吩咐你哋嘅所有嘢，都要教佢哋照住做。嗱，我每一日都同你哋一齊，一直到呢個時代完結。」

粵讀聖經 · Can Read Bible
本站原創粵語譯文：CC BY-NC-SA 4.0
https://creativecommons.org/licenses/by-nc-sa/4.0/
引用時請附書卷章節、來源網址；有修改請註明。第三方內容保留原有授權。