羅馬書 9 · 粵讀聖經

管理員上載／人工修訂；未另行獨立校對。

1 我喺基督裏面講嘅係真話，唔係大話；我嘅良心亦都喺聖靈裏面同我一齊作證：


2 我極之難過，心裏面嘅痛一直都冇停過。


3 因為，為咗我嘅弟兄，即係同我有血緣關係嘅同胞，如果可以，我情願自己受咒詛，同基督隔絕。


4 佢哋係以色列人，有上帝兒女嘅身份，得着榮耀同各個約；律法係賜畀佢哋嘅，敬拜事奉同各樣應許亦都屬於佢哋。


5 各位先祖係屬於佢哋嘅；講到肉身，基督亦都出自佢哋。佢係喺萬有之上、永遠應受稱頌嘅上帝。阿們。



6 不過，呢個唔係話上帝嘅話落咗空。因為，有以色列血統嘅人，唔係個個都屬於以色列。


7 亦都唔係因為係亞伯拉罕嘅後裔，就個個都算係佢嘅兒女。反而係：「以撒嗰一系嘅，先會被認作你嘅後裔。」


8 即係話，肉身生出嚟嘅兒女，唔係因此就係上帝嘅兒女；按應許而生嘅兒女，先算係後裔。


9 因為應許係噉講嘅：「到指定嗰個時候，我會嚟，撒拉就會有個仔。」



10 唔單止噉，利百加都有同樣嘅情況。佢懷咗孕，兩個仔都係出自同一個男人，就係我哋嘅祖先以撒。


11 因為，喺兩個仔仲未出世、亦都未做過任何好事或者壞事嗰陣，


12 上帝就對利百加講：「大仔會做細仔嘅奴僕。」上帝喺嗰陣噉講，係要使佢按揀選所定嘅旨意繼續成立；呢個旨意唔係靠行為，而係靠呼召人嘅上帝。


13 正如經上記住：「我愛雅各，但我恨以掃。」



14 噉，我哋應該點講呢？上帝係唔公義嘅咩？絕對唔係！


15 因為佢對摩西講：「我要憐憫邊個，就憐憫邊個；我要同情邊個，就同情邊個。」


16 所以，呢件事唔係靠人嘅意願，亦都唔係靠人努力奔跑，而係靠施憐憫嘅上帝。


17 因為聖經對法老講：「我令你興起，正正就係為咗要喺你身上顯出我嘅能力，同埋要我嘅名傳遍全地。」


18 所以，上帝想憐憫邊個，就憐憫邊個；佢想令邊個心硬，就令邊個心硬。



19 噉，你會對我講：「上帝點解仲要責怪人呢？因為有邊個抵擋得住佢嘅旨意吖？」


20 但係，人啊，你究竟係邊個，竟然同上帝駁嘴呢？造出嚟嘅嘢，唔通會對造佢嗰位講：「你點解將我造成噉？」


21 陶匠唔係有權處理啲泥，用同一團泥造器皿，一件作尊貴嘅用途，另一件作卑下嘅用途咩？



22 但係，如果上帝想顯出佢嘅怒氣，畀人知道佢嘅能力，又極之忍耐噉容忍嗰啲承受怒氣、已經被預備好要滅亡嘅器皿，


23 而佢噉樣忍耐，亦都係為咗向嗰啲蒙憐憫嘅器皿顯出佢豐盛嘅榮耀，呢啲器皿又係佢預先預備好、要得榮耀嘅，噉又點呢？


24 呢啲器皿就係上帝呼召嘅我哋，唔單止來自猶太人，亦都來自外族人。



25 正如佢喺何西阿書裏面講：「我會將唔係我子民嘅，稱作『我嘅子民』；將唔蒙愛嘅，稱作『蒙愛嘅』。」


26 仲有：「喺曾經對佢哋講『你哋唔係我嘅子民』嗰個地方，就喺嗰度，佢哋會被稱為永活上帝嘅兒女。」



27 講到以色列，以賽亞大聲宣告：「就算以色列子孫嘅數目多到好似海沙噉，都只有剩低嗰啲會得救。


28 因為主會喺地上徹底又迅速噉執行佢嘅判決。」


29 又正如以賽亞以前講過：「如果萬軍之主冇留低後裔畀我哋，我哋早就好似所多瑪噉，同蛾摩拉一樣喇。」



30 噉，我哋應該點講呢？嗰啲本來冇追求義嘅外族人，反而得着咗義，就係出於信心嘅義。


31 但係以色列人追求律法，想藉住律法得義，反而冇達到律法嘅要求。


32 點解呢？因為佢哋唔係靠信心去追求，而係以為靠行為就可以得義。佢哋畀嗰塊絆腳石絆倒咗，


33 正如經上記住：「睇吓，我喺錫安放一塊絆腳石，就係一塊令人跌倒嘅磐石；信靠佢嘅人，唔會蒙羞。」



授權：CC-BY-NC-SA-4.0