约翰福音 2章 — 粤读圣经
更新：2026-10-08

1 第三日，加利利嘅迦拿有个婚宴，耶稣嘅妈妈喺嗰度。

2 耶稣同佢啲门徒亦都畀人请咗去饮。

3 酒用晒喇，耶稣嘅妈妈就同佢讲：「佢哋冇酒喇。」

4 耶稣同佢讲：「阿妈，点解要我理呢件事呢？我嘅时候仲未到。」

5 佢妈妈就同啲侍应讲：「佢叫你哋做乜，你哋就做乜。」

6 嗰度摆住六个石水缸，係犹太人按礼仪用水洗净嗰阵用嘅。每个装得落大约八十至一百二十公升。

7 耶稣同侍应讲：「用水装满啲水缸。」佢哋就加水，一直加到缸口。

8 耶稣又同佢哋讲：「而家舀啲出嚟，攞去畀管宴席嗰个人。」佢哋就攞去。

9 管宴席嗰个人尝咗啲由水变成嘅酒，唔知道係边度嚟，但舀水嘅侍应就知道。管宴席嗰个人就叫新郎过嚟，

10 同佢讲：「个个都係先摆好酒出嚟，客人饮醉咗之后，就摆差啲嘅。你反而留住啲好酒，到而家先攞出嚟！」

11 呢个係耶稣行嘅第一个神迹，喺加利利嘅迦拿行嘅。佢显出自己嘅荣耀，门徒就信咗佢。

12 之后，耶稣同佢妈妈、兄弟、门徒一齐落迦百农，喺嗰度住咗冇几日。

13 犹太人嘅逾越节近喇，耶稣就上耶路撒冷。

14 佢见到圣殿里面有人卖牛、羊同白鸽，亦都有啲换钱嘅人坐喺嗰度。

15 佢用绳整咗条鞭，将羊同牛全部赶出圣殿，又将换钱嗰啲人嘅散银倒出嚟，反转佢哋啲台，

16 同啲卖白鸽嘅人讲：「攞走呢啲嘢！唔好将我爸爸嘅家变成做买卖嘅地方！」

17 门徒就记起，圣经上写住：「我对你嘅家嗰份热诚，会吞咗我。」

18 犹太人就问耶稣：「你做呢啲事，可以行乜嘢神迹畀我哋睇，证明你有权噉做？」

19 耶稣答：「你哋拆咗呢座殿，三日之内，我会将佢起返。」

20 犹太人就话：「起呢座殿，用咗四十六年，你三日之内就起得返？」

21 但耶稣讲嗰座殿，其实係指佢自己嘅身体。

22 所以，佢从死人中复活之后，门徒就记返佢讲过呢番话，于是信咗圣经，同埋耶稣讲嘅话。

23 逾越节期间，耶稣喺耶路撒冷过节。好多人见到佢行嘅神迹，就信咗佢。

24 但耶稣唔将自己交托畀佢哋，因为佢了解所有人，

25 亦唔需要任何人话畀佢知人係点样，因为佢自己知道人内心係点。

粤读圣经 · Can Read Bible
本站原创粤语译文：CC BY-NC-SA 4.0
https://creativecommons.org/licenses/by-nc-sa/4.0/
引用时请附书卷章节、来源网址；有修改请注明。第三方内容保留原有授权。