路加福音 18章 — 粤读圣经
更新：2026-10-08

1 耶稣同门徒讲咗个比喻，要佢哋时常祈祷，唔好灰心。

2 佢话：「有座城，有个法官唔怕上帝，亦唔将人放喺眼内。

3 嗰座城有个寡妇，成日去搵佢，话：『我同对方打官司，求你帮我讨回公道！』

4 有一段时间，个法官都唔肯。后来佢心谂：『我虽然唔怕上帝，亦唔将人放喺眼内，

5 但呢个寡妇成日烦住我，我就帮佢讨回公道啦，免得佢不停嚟，缠到我筋疲力尽。』」

6 主话：「你哋听吓，呢个唔正直嘅法官讲乜嘢。

7 噉上帝所揀选嘅人日夜向佢呼求，佢会唔为佢哋讨回公道咩？佢会拖延唔帮佢哋咩？

8 我话畀你哋听，佢会迅速为佢哋讨回公道。不过，人子嚟到嗰阵，仲会唔会喺地上搵到信心呢？」

9 耶稣又对一啲自以为係义人、睇唔起其他人嘅人，讲咗呢个比喻：

10 「有两个人上圣殿祈祷，一个係法利赛人，另一个係收税嘅人。

11 个法利赛人企定，自己祈祷话：『上帝呀，多谢你，我唔似其他人，强抢、唔正直、犯奸淫，亦唔似呢个收税嘅人。

12 我一个星期禁食两次，凡係我得到嘅，都献十分之一。』

13 个收税嘅人就企喺远处，连眼都唔肯抬起望天，只係揼住心口，话：『上帝呀，求你开恩，可怜我呢个罪人！』

14 我话畀你哋听，返屋企嗰阵，畀上帝接纳为义人嘅係呢个收税嘅人，唔係嗰个法利赛人。因为凡係抬高自己嘅，都会畀贬低；放低自己嘅，就会畀抬高。」

15 有人连啲婴儿都带嚟耶稣嗰度，想佢摸吓佢哋。门徒见到，就责备带佢哋嚟嘅人。

16 耶稣就叫啲细路嚟，话：「畀啲细路嚟我呢度，唔好阻住佢哋，因为上帝嘅国係属于好似佢哋噉嘅人。

17 我实在话畀你哋听，边个唔好似细路噉接受上帝嘅国，就绝对入唔到去。」

18 有个领袖问耶稣：「良善嘅老师，我要做乜嘢，先可以承受永生呢？」

19 耶稣同佢讲：「点解你叫我良善呢？除咗上帝一位，冇人係良善嘅。

20 诫命你知道㗎喇：唔好犯奸淫，唔好杀人，唔好偷嘢，唔好作假见证，要孝敬你爸爸同妈妈。」

21 嗰个人话：「呢啲我由后生嗰阵开始，全部都有遵守。」

22 耶稣听到，就同佢讲：「你仲欠一样：卖晒你拥有嘅嘢，分畀穷人，你就会有财宝喺天上；然后嚟跟从我。」

23 嗰个人听到呢啲话，就好难过，因为佢非常有钱。

24 耶稣望住佢，话：「有钱嘅人要入上帝嘅国，几咁难呀！

25 一只骆驼穿过针眼，都比有钱人入上帝嘅国容易。」

26 听到嘅人就话：「噉边个可以得救呢？」

27 耶稣话：「人做唔到嘅，上帝做得到。」

28 彼得话：「你睇，我哋已经放低自己拥有嘅，跟从你喇。」

29 耶稣对佢哋话：「我实在话畀你哋听，任何人为咗上帝嘅国，离开屋企、老婆、兄弟、父母或者仔女，

30 都一定会喺今世得到好多倍，喺来世得到永生。」

31 耶稣带埋十二个门徒，同佢哋讲：「你哋睇，我哋而家上耶路撒冷。先知写低关于人子嘅一切，都会实现。

32 佢会畀人交畀外族人，畀人戏弄、侮辱、吐口水。

33 佢哋会鞭打佢，再杀死佢；第三日佢会复活。」

34 但呢啲事，门徒一啲都唔明。呢番话对佢哋係隐藏住嘅，佢哋唔明白耶稣讲紧乜。

35 耶稣行近耶利哥嗰阵，有个盲人坐喺路边乞食。

36 佢听到有人群经过，就问发生咩事。

37 人哋话畀佢听：「係拿撒勒人耶稣行过。」

38 佢就大声叫：「耶稣，大卫嘅子孙，可怜我啦！」

39 行喺前面嘅人责备佢，叫佢唔好出声，佢反而叫得更大声：「大卫嘅子孙，可怜我啦！」

40 耶稣停低，吩咐人带个盲人过嚟。个盲人行近，耶稣就问佢：

41 「你想我为你做乜嘢？」佢话：「主呀，我想睇得见。」

42 耶稣同佢讲：「睇得见啦！你嘅信心救咗你。」

43 佢即刻睇得见，就跟住耶稣，一路赞美上帝。所有人见到，都赞美上帝。

粤读圣经 · Can Read Bible
本站原创粤语译文：CC BY-NC-SA 4.0
https://creativecommons.org/licenses/by-nc-sa/4.0/
引用时请附书卷章节、来源网址；有修改请注明。第三方内容保留原有授权。