路加福音 4章 — 粤读圣经
更新：2026-10-08

1 耶稣充满圣灵，由约旦河返嚟。佢喺旷野里面受圣灵带领，

2 一共四十日；期间，魔鬼试探佢。嗰段日子，佢乜都冇食。过咗嗰段日子，佢就肚饿喇。

3 魔鬼对佢话：「你如果係上帝嘅儿子，就叫呢嚿石头变成饼啦！」

4 耶稣回答佢话：「圣经上写住：『人生存，唔係净係靠饼。』」

5 魔鬼带佢上到高处，喺一瞬间，将世上所有国家都指畀佢睇。

6 魔鬼对佢话：「呢一切权柄，同埋呢啲国家嘅荣耀，我都会畀你，因为呢一切已经交咗畀我，我想畀边个，就畀边个。

7 所以，你只要喺我面前拜我，呢一切就都係你嘅喇！」

8 耶稣回答佢话：「圣经上写住：『要敬拜主，你嘅上帝，净係事奉佢。』」

9 魔鬼又带佢去耶路撒冷，叫佢企喺圣殿高处嘅边沿，对佢话：「你如果係上帝嘅儿子，就由呢度跳落去啦！

10 因为圣经上写住：『上帝会为你吩咐佢嘅天使，好好保护你。』

11 又话：『佢哋会用手托住你，唔畀你只脚撞到石头。』」

12 耶稣回答佢话：「圣经亦讲过：『唔可以试探主，你嘅上帝。』」

13 魔鬼做完晒各样试探，就暂时离开咗佢，等另一个机会。

14 耶稣靠住圣灵嘅能力返到加利利，关于佢嘅消息传遍咗周围一带。

15 佢喺当地人嘅会堂教导人，个个都赞佢。

16 耶稣嚟到自己长大嘅地方拿撒勒。到安息日，佢照平时嘅习惯入会堂，企起身读圣经。

17 有人将先知以赛亚嘅书卷交畀佢。佢展开书卷，搵到一段经文，上面写住：

18 「主嘅灵喺我身上，因为佢膏立咗我，委派我向穷人传好消息。佢差派我，宣告被掳走嘅人可以得到释放，盲人可以重新睇得见，叫受压迫嘅人得到自由，

19 宣告主恩待人嘅一年。」

20 耶稣卷返埋书卷，交返畀会堂嘅服务人员，就坐低。会堂里面所有人都望实佢。

21 佢开始对佢哋讲：「今日，你哋啱啱听到嘅呢段圣经，已经应验喇！」

22 个个都称赞佢，对佢讲出嚟嗰啲充满恩惠嘅话，觉得好惊奇。佢哋话：「呢个唔係约瑟个仔咩？」

23 耶稣对佢哋话：「你哋一定会用呢句俗语对我讲：『医生，医好你自己先啦！』又会话：『我哋听讲你喺迦百农做过嘅事，你都喺自己家乡呢度做啦！』」

24 佢又话：「我实在话畀你哋听，冇一个先知会喺自己家乡受到欢迎。

25 我同你哋讲真嘅：以利亚嗰个年代，天关咗，三年零六个月冇落雨，成片土地闹大饥荒。嗰阵，以色列有好多寡妇，

26 但以利亚冇被派去佢哋嗰度，连一个都冇。佢只係被派去西顿一带嘅撒勒法，一个寡妇嗰度。

27 先知以利沙嗰个年代，以色列有好多患麻疯病嘅人，但冇一个得到洁净，只有叙利亚人乃缦得到洁净。」

28 会堂里面嘅人听到呢啲话，个个都嬲到不得了。

29 佢哋企起身，将耶稣赶出城。佢哋座城係建喺山上嘅，佢哋就将耶稣带到山崖边，想将佢掟落去。

30 但耶稣由佢哋中间穿过，离开咗。

31 耶稣落到加利利嘅一座城，叫迦百农，喺安息日教导当地嘅人。

32 佢哋对佢嘅教导好惊讶，因为佢讲嘢带住权柄。

33 会堂里面有个人，畀一只污秽嘅鬼附住。佢大声嗌：

34 「喂！拿撒勒人耶稣，我哋同你有乜关係呀？你係嚟消灭我哋嘅咩？我知道你係边个，你係上帝嘅圣者！」

35 耶稣斥责嗰只鬼，话：「收声！由佢身上出嚟！」嗰只鬼将嗰个人掟低喺众人中间，就由佢身上出咗嚟，一啲都冇伤害佢。

36 个个都好惊讶，互相议论话：「呢个係乜嘢命令嚟㗎？佢用权柄同能力吩咐啲污秽嘅鬼，佢哋就出嚟喇！」

37 关于耶稣嘅消息，传到周围一带每个地方。

38 耶稣起身离开会堂，入咗西门间屋。西门嘅外母正发高烧，有人就为佢向耶稣求助。

39 耶稣企喺佢身边，斥责嗰个热病，个女人就退咗烧。佢即刻起身，服侍佢哋。

40 太阳落山嗰阵，凡係身边有病人嘅，都带佢哋嚟耶稣嗰度。呢啲病人患各种唔同嘅病。耶稣逐个按手喺佢哋身上，医好佢哋。

41 亦有鬼由好多人身上出嚟，大声嗌：「你係上帝嘅儿子！」耶稣就斥责啲鬼，唔准佢哋讲嘢，因为佢哋知道佢係基督。

42 天光嘅时候，耶稣出去，去咗一个偏僻冇人嘅地方。群众一直搵佢，搵到佢嗰度，就想留住佢，唔畀佢离开。

43 耶稣对佢哋话：「我一定要去其他城，向嗰度嘅人传上帝掌权嘅好消息，因为我就係为咗呢个目的而被差派嚟嘅。」

44 佢就继续喺犹太各间会堂宣讲。

粤读圣经 · Can Read Bible
本站原创粤语译文：CC BY-NC-SA 4.0
https://creativecommons.org/licenses/by-nc-sa/4.0/
引用时请附书卷章节、来源网址；有修改请注明。第三方内容保留原有授权。