路加福音 6章 — 粤读圣经 更新：2026-10-08 1 有一个安息日，耶稣行过田地。佢嘅门徒一路摘谷穗，用手搓出啲谷粒嚟食。 2 有啲法利赛人话：「你哋点解做安息日唔准做嘅事？」 3 耶稣回答佢哋话：「大卫同佢身边嘅人肚饿嗰阵，佢做过啲乜，你哋连呢件事都未读过咩？ 4 佢入咗上帝嘅殿，攞咗摆喺上帝面前嘅饼嚟食，仲分畀同佢一齐嘅人食。嗰啲饼，除咗祭司，其他人都唔准食㗎。」 5 耶稣又对佢哋话：「人子係安息日嘅主。」 6 另一个安息日，耶稣入会堂教导人。嗰度有个人，右手萎缩咗。 7 经学家同法利赛人留意住耶稣，睇吓佢会唔会喺安息日医人，好搵机会控告佢。 8 但耶稣知道佢哋心里面谂紧乜，就对嗰个手萎缩咗嘅人话：「起身，企喺中间。」嗰个人就起身，企咗喺嗰度。 9 耶稣对佢哋话：「我问你哋，安息日容许做好事，定係做坏事？救人条命，定係害人条命？」 10 佢望匀晒佢哋，跟住对嗰个人话：「伸只手出嚟。」嗰个人照做，只手就好返喇。 11 佢哋就嬲到失晒理智，互相商量可以点样对付耶稣。 12 嗰段日子，耶稣有一次出去上山祈祷，成晚向上帝祈祷。 13 天光之后，佢叫啲门徒过嚟，喺佢哋当中揀咗十二个，仲称佢哋为使徒。 14 佢哋係西门（耶稣又帮佢改名叫彼得），同埋西门嘅兄弟安得烈、雅各、约翰、腓力、巴多罗买， 15 马太、多马、亚勒腓个仔雅各，被称为奋锐者嘅西门， 16 雅各个仔犹大，同埋加略人犹大，佢后来背叛咗耶稣。 17 耶稣同佢哋一齐落山，企喺一个平坦嘅地方。嗰度有好多佢嘅门徒，亦有一大群人，由犹太各处、耶路撒冷，同推罗、西顿沿海一带嚟。 18 佢哋係嚟听佢讲嘢，同埋希望身上嘅病得到医治。受污秽嘅灵困扰嘅人，亦得到医治。 19 所有人都想摸到佢，因为有能力由佢身上发出嚟，医好晒所有人。 20 耶稣抬起眼，望住门徒，话：「你哋穷嘅人有福喇，因为上帝嘅国係你哋嘅。 21 你哋而家挨饿嘅人有福喇，因为你哋会食得饱。你哋而家喊紧嘅人有福喇，因为你哋会笑。 22 人哋因为人子而憎你哋、排斥你哋、辱骂你哋，仲觉得连你哋嘅名都邪恶，将佢唾弃，嗰阵你哋有福喇。 23 到嗰日，你哋要开心，欢喜到跳起嚟，因为你哋喺天上嘅赏赐好大！佢哋啲祖先，以前都係噉样对待先知。 24 不过，你哋有钱嘅人有祸喇，因为你哋嗰份安慰，已经得到晒喇。 25 你哋而家食得饱嘅人有祸喇，因为你哋会挨饿。你哋而家笑紧嘅人有祸喇，因为你哋会哀伤，会喊。 26 如果个个都赞你哋，你哋就有祸喇，因为佢哋啲祖先，以前都係噉样对待假先知。 27 不过，你哋听紧我讲嘢嘅人，我要同你哋讲：要爱你哋嘅敌人，善待憎你哋嘅人， 28 为咒诅你哋嘅人祝福，为欺负你哋嘅人祈祷。 29 有人打你一边面，另一边都畀佢打；有人攞你件外衣，连里面嗰件衫，都唔好阻止佢攞。 30 无论边个问你要嘢，你都要畀；有人攞咗你嘅嘢，唔好问佢攞返。 31 你哋想人哋点样对你哋，你哋就照样对人。 32 如果你哋只係爱嗰啲爱你哋嘅人，有乜值得赞呢？连罪人都会爱嗰啲爱佢哋嘅人啦。 33 如果你哋只係善待嗰啲善待你哋嘅人，有乜值得赞呢？连罪人都係噉做啦。 34 如果你哋只係借畀嗰啲你哋指望会还返嘅人，有乜值得赞呢？连罪人都会借畀罪人，希望收返同样嘅数。 35 不过，你哋要爱敌人，做好事，借畀人，唔好指望收返。噉样，你哋嘅赏赐就会好大，你哋会成为至高上帝嘅仔女，因为佢连唔知感恩嘅人同恶人，都善待佢哋。 36 你哋要怜悯人，好似你哋嘅天父怜悯人噉。 37 唔好审判人，你哋就一定唔会受审判；唔好定人罪，你哋就一定唔会被定罪。饶恕人，你哋就会得到饶恕。 38 你哋要畀人，就会有嘢畀返你哋。人哋会用十足嘅份量，压实、摇实、满到泻，倒落你哋兜起嘅衫襟度。因为你哋用乜嘢尺度量畀人，就会用返同一个尺度量畀你哋。」 39 耶稣又同佢哋讲咗个比喻：「盲人点可以带盲人行路呢？两个唔係都会跌落坑咩？ 40 学生唔会高过老师。不过，凡係受过完整训练嘅，都会好似自己嘅老师噉。 41 你点解见到弟兄眼里面嗰粒木屑，自己眼里面嗰条大梁就冇留意呢？ 42 你自己连眼里面嗰条大梁都睇唔见，又点可以同弟兄讲：『弟兄，等我帮你攞走你眼里面嗰粒木屑啦。』你呢个假冒为善嘅人，先攞走自己眼里面嗰条大梁，之后你就睇得清楚，可以攞走弟兄眼里面嗰粒木屑。 43 好树唔会结坏果子，坏树亦唔会结好果子。 44 每棵树，都可以从佢结嘅果子认出嚟。冇人会喺荆棘丛摘无花果，亦唔会喺刺丛摘葡萄。 45 好人会由心里面积存嘅好嘢，带出好嘢；恶人就会由心里面嘅坏嘢，带出坏嘢。因为一个人心里面充满啲乜，个口就讲啲乜。 46 你哋点解叫我『主呀，主呀』，但又唔照我讲嘅去做呢？ 47 凡係嚟我呢度，听到我嘅话，又照住做嘅人，我话畀你哋知佢似乜： 48 佢好似一个起屋嘅人，挖地，挖到好深，将地基打喺岩石上。发洪水嗰阵，河水冲埋间屋度，但摇都摇唔郁佢，因为间屋起得好。 49 但听到又唔做嘅人，就好似一个喺地面起屋、冇打地基嘅人。河水一冲埋去，间屋即刻冧咗，冧得好厉害。」 粤读圣经 · Can Read Bible 本站原创粤语译文：CC BY-NC-SA 4.0 https://creativecommons.org/licenses/by-nc-sa/4.0/ 引用时请附书卷章节、来源网址；有修改请注明。第三方内容保留原有授权。