马太福音 23章 — 粤读圣经 更新：2026-10-05 1 嗰阵，耶稣对群众同佢嘅门徒讲： 2 「熟读圣经嘅文士，同埋法利赛人，坐喺摩西嘅位上教人。 3 所以，佢哋话畀你哋知要做嘅，你哋都要照做、遵守。不过，唔好学佢哋嘅做法，因为佢哋得个讲字，自己就唔做。 4 佢哋绑好一捆捆重担，摆上人哋膊头，自己就连用一只手指郁下啲重担都唔肯。 5 佢哋做乜都係要畀人睇。所以，佢哋将身上戴住、装经文嘅盒整阔啲，衫边嘅流苏又整大啲。 6 佢哋钟意出席宴会嗰阵坐上座，去到会堂又坐最尊贵嘅位； 7 又钟意人哋喺街市向佢哋问好，叫佢哋做『拉比』，即係老师。 8 但係你哋唔好畀人叫做『拉比』，因为你哋只有一位老师，而你哋全部都係兄弟姊妹。 9 亦唔好叫地上任何人做你哋嘅『父亲』，因为你哋只有一位父亲，就係天上嗰位。 10 你哋亦唔好畀人叫做『导师』，因为你哋只有一位导师，就係基督。 11 你哋当中最有地位嗰个，要做服侍你哋嘅人。 12 边个抬高自己，边个就会畀贬低；边个放低自己，边个就会畀抬高。 13 但係，你哋呢啲文士同法利赛人，咁虚伪，有祸喇！你哋当住人面闩埋天国道门，自己唔入去，连想入去嘅人，你哋都唔畀佢哋入。 15 你哋呢啲文士同法利赛人，咁虚伪，有祸喇！你哋水路陆路都走遍，只为咗令一个人入犹太教；等佢入咗教，你哋就令佢变成地狱之子，比你哋仲衰一倍。 16 你哋呢啲盲咗眼嘅带路人，有祸喇！你哋话：『指住圣所发誓，唔算数；但係指住圣所入面嘅金发誓，就一定要守誓。』 17 你哋又蠢又盲！究竟边样先至重要？係啲金，定係令啲金成为圣洁嘅圣所？ 18 你哋又话：『指住祭坛发誓，唔算数；但係指住祭坛上面嘅祭物发誓，就一定要守誓。』 19 你哋真係盲咗！究竟边样先至重要？係祭物，定係令祭物成为圣洁嘅祭坛？ 20 所以，指住祭坛发誓，就係指住祭坛同上面所有嘢发誓； 21 指住圣所发誓，就係指住圣所同住喺入面嗰位发誓； 22 指住天发誓，就係指住上帝嘅宝座，同坐喺宝座上面嗰位发誓。 23 你哋呢啲文士同法利赛人，咁虚伪，有祸喇！你哋连薄荷、莳萝同孜然呢啲香料，都会攞十分之一出嚟奉献；但係律法入面更重要嘅事，你哋就摆埋一边：做人要公正、有怜悯、忠诚可靠。呢啲係你哋应该做嘅，十分之一嘅奉献亦唔可以唔做。 24 你哋呢啲盲咗眼嘅带路人，连只蚊都要隔走，反而将成只骆驼吞落肚！ 25 你哋呢啲文士同法利赛人，咁虚伪，有祸喇！你哋洗干净个杯同只碟嘅外面，但係入面装满咗抢夺同放纵。 26 你呢个盲咗眼嘅法利赛人，先洗干净个杯同只碟嘅入面啦，噉样个杯外面都会干净。 27 你哋呢啲文士同法利赛人，咁虚伪，有祸喇！你哋好似啲搽咗白灰嘅坟墓，外面睇落好靓，但係入面装满死人骨头同各种污秽嘅嘢。 28 你哋都係一样：人哋睇你哋外表，觉得你哋好正直；但係你哋入面满晒虚伪同违背律法嘅嘢。 29 你哋呢啲文士同法利赛人，咁虚伪，有祸喇！你哋为先知起坟墓，又将义人嘅墓装饰得靓靓哋， 30 仲话：『如果我哋活喺祖先嗰个年代，就一定唔会同佢哋一齐杀害先知、流先知嘅血。』 31 你哋噉讲，就係自己作证，承认自己係杀害先知嗰啲人嘅后代。 32 噉你哋就接住祖先做落去，凑满佢哋嗰份罪恶啦！ 33 你哋呢啲蛇、毒蛇嘅后代，点逃得过落地狱嘅判决？ 34 所以，听住，我差派先知、有智慧嘅人，同埋文士去你哋嗰度。当中有啲会畀你哋杀害、钉十字架；有啲会畀你哋喺你哋嘅会堂入面用鞭嚟打，仲由一个城追逼到另一个城。 35 噉样，地上流过嘅所有义人嘅血，都要算喺你哋头上：由义人亚伯嘅血，一直到巴拉加个仔撒迦利亚嘅血。撒迦利亚就係你哋喺圣所同祭坛中间杀害嗰个。 36 我实在话畀你哋知，呢一切都会落喺呢一代人身上。 37 耶路撒冷呀，耶路撒冷！你杀害先知，又用石头掟死派到你呢度嘅人。我几多次想聚埋你嘅儿女，好似母鸡将自己啲鸡仔聚埋喺翼底噉，但係你哋唔肯！ 38 睇吓，你哋个家就噉畀撇低，留返畀你哋，荒凉一片。 39 因为我话畀你哋知，由而家开始，你哋一定唔会再见到我，直到你哋话：『奉主嘅名而嚟嗰位，係蒙福嘅！』」 粤读圣经 · Can Read Bible 本站原创粤语译文：CC BY-NC-SA 4.0 https://creativecommons.org/licenses/by-nc-sa/4.0/ 引用时请附书卷章节、来源网址；有修改请注明。第三方内容保留原有授权。