羅馬書 9 · 粵讀聖經

管理員上載／人工修訂；未另行獨立校對。

1 我喺基督里面讲嘅係真话，唔係大话；我嘅良心亦都喺圣灵里面同我一齐作证：


2 我极之难过，心里面嘅痛一直都冇停过。


3 因为，为咗我嘅弟兄，即係同我有血缘关係嘅同胞，如果可以，我情愿自己受咒诅，同基督隔绝。


4 佢哋係以色列人，有上帝儿女嘅身份，得着荣耀同各个约；律法係赐畀佢哋嘅，敬拜事奉同各样应许亦都属于佢哋。


5 各位先祖係属于佢哋嘅；讲到肉身，基督亦都出自佢哋。佢係喺万有之上、永远应受称颂嘅上帝。阿们。



6 不过，呢个唔係话上帝嘅话落咗空。因为，有以色列血统嘅人，唔係个个都属于以色列。


7 亦都唔係因为係亚伯拉罕嘅后裔，就个个都算係佢嘅儿女。反而係：「以撒嗰一系嘅，先会被认作你嘅后裔。」


8 即係话，肉身生出嚟嘅儿女，唔係因此就係上帝嘅儿女；按应许而生嘅儿女，先算係后裔。


9 因为应许係噉讲嘅：「到指定嗰个时候，我会嚟，撒拉就会有个仔。」



10 唔单止噉，利百加都有同样嘅情况。佢怀咗孕，两个仔都係出自同一个男人，就係我哋嘅祖先以撒。


11 因为，喺两个仔仲未出世、亦都未做过任何好事或者坏事嗰阵，


12 上帝就对利百加讲：「大仔会做细仔嘅奴仆。」上帝喺嗰阵噉讲，係要使佢按揀选所定嘅旨意继续成立；呢个旨意唔係靠行为，而係靠呼召人嘅上帝。


13 正如经上记住：「我爱雅各，但我恨以扫。」



14 噉，我哋应该点讲呢？上帝係唔公义嘅咩？绝对唔係！


15 因为佢对摩西讲：「我要怜悯边个，就怜悯边个；我要同情边个，就同情边个。」


16 所以，呢件事唔係靠人嘅意愿，亦都唔係靠人努力奔跑，而係靠施怜悯嘅上帝。


17 因为圣经对法老讲：「我令你兴起，正正就係为咗要喺你身上显出我嘅能力，同埋要我嘅名传遍全地。」


18 所以，上帝想怜悯边个，就怜悯边个；佢想令边个心硬，就令边个心硬。



19 噉，你会对我讲：「上帝点解仲要责怪人呢？因为有边个抵挡得住佢嘅旨意吖？」


20 但係，人啊，你究竟係边个，竟然同上帝驳嘴呢？造出嚟嘅嘢，唔通会对造佢嗰位讲：「你点解将我造成噉？」


21 陶匠唔係有权处理啲泥，用同一团泥造器皿，一件作尊贵嘅用途，另一件作卑下嘅用途咩？



22 但係，如果上帝想显出佢嘅怒气，畀人知道佢嘅能力，又极之忍耐噉容忍嗰啲承受怒气、已经被预备好要灭亡嘅器皿，


23 而佢噉样忍耐，亦都係为咗向嗰啲蒙怜悯嘅器皿显出佢丰盛嘅荣耀，呢啲器皿又係佢预先预备好、要得荣耀嘅，噉又点呢？


24 呢啲器皿就係上帝呼召嘅我哋，唔单止来自犹太人，亦都来自外族人。



25 正如佢喺何西阿书里面讲：「我会将唔係我子民嘅，称作『我嘅子民』；将唔蒙爱嘅，称作『蒙爱嘅』。」


26 仲有：「喺曾经对佢哋讲『你哋唔係我嘅子民』嗰个地方，就喺嗰度，佢哋会被称为永活上帝嘅儿女。」



27 讲到以色列，以赛亚大声宣告：「就算以色列子孙嘅数目多到好似海沙噉，都只有剩低嗰啲会得救。


28 因为主会喺地上彻底又迅速噉执行佢嘅判决。」


29 又正如以赛亚以前讲过：「如果万军之主冇留低后裔畀我哋，我哋早就好似所多玛噉，同蛾摩拉一样喇。」



30 噉，我哋应该点讲呢？嗰啲本来冇追求义嘅外族人，反而得着咗义，就係出于信心嘅义。


31 但係以色列人追求律法，想藉住律法得义，反而冇达到律法嘅要求。


32 点解呢？因为佢哋唔係靠信心去追求，而係以为靠行为就可以得义。佢哋畀嗰块绊脚石绊倒咗，


33 正如经上记住：「睇吓，我喺锡安放一块绊脚石，就係一块令人跌倒嘅磐石；信靠佢嘅人，唔会蒙羞。」



授權：CC-BY-NC-SA-4.0